ಒಳಲ್ ಗೊತಿತಾ ??

ಬರ್ದವ್ರ್ : ಪೂರ್ಣಿಮಾ ಕಮಲಶಿಲೆ

ಆಸಾಡಿ ತಿಂಗ್ಳ್ ಮಳೆ ಹೊಯ್ತಿತ್..ಎಲ್ಲ ಬದಿ ಗೆದ್ದಿ ಬ್ಯಾಸಾಯ ಮುಗ್ದಿತ್ .ಮೊದಲಿನ್ ಹಾಂಗೆ ಉದ್ದಾನುದ್ದಕ್ಕೂ ಬೈಲ್ ಇಲ್ಲೆ ಈಗ. ನಮ್ ಬದಿ ಗೆದ್ದಿ ಬ್ಯಾಸಾಯದ್ ಬೈಲಂಗೆಲ್ಲ ಅಡ್ಕಿ ,ತೆಂಗ್ ,ಬಾಳಿ ಹಾಕಿ ಚೂರ್ ಪಾರ್ ಭತ್ತ ,ಧಾನ್ಯ  ಬೆಳುಕ್ ಗೆದ್ದಿ ಇಟ್ಕಂಡಿರ್. ಮಕ್ಕಿಗೆದ್ದಿ,ಹಾಡಿ ಗುಡ್ಡಿಯಂಗೆಲ್ಲ ರಬ್ಬರ್, ಪರಂಗಿ ಬೆಳೆ ಬೆಳುಕೆ ಕೇರಳದವ್ರಿಗ್ ವಹಿಸಿಕೊಡ್ವರೆ ಹೆಚ್ಚಾಯ್ರ್. ಏನೇ ಇರ್ಲಿ * ಕಾಲಕ್ ತಕ್ನೆ ಕೋಲ* ಅಂತ್ರಲೆ  ಹಾಂಗಾಯ್ತ್ ಅಲ್ದಾ!ಮೂರ್ ಮುಡಿ, ಮುವತ್ತಾನಿ, ಕಂಬ್ಳ ಗೆದ್ದಿ ಅಂದ್ ಹಲವ್ ನಮನಿ ಗೆದ್ದಿ ಹೊಸ್ರೂ ಹಂಬ್ಲ್ ಹೋಯ್ತ್ ಈಗ್ಳಿನರಿಗೆ. ಹಿಂದಿನರ್ ಹೀಂಗಿನ್ ಗೆದ್ದಿಯಂಗೆ ,ಕಾರ್ತಿ,ಸುಗ್ಗಿ,ಕೊಳ್ಕಿ ಅಂದೇಳಿ ಮೂರ್ ನಮನಿ ಬ್ಯಾಸಾಯ ಮಾಡ್ತಿದ್ರ್. ಈಗ ಕಾರ್ತಿ ಬ್ಯಾಸಾಯಕ್ಕೆ ಆಳ್ ಸಿಕ್ಕುದಿಲ್ಲ.ಆಳಿನ್ ತಾಪತ್ರಿ ಹೇಳಿ ತೀರ.ಮತ್ತೀಗ ಹೋರಿ ಜೋಡ್ ಕಟ್ವರೂ ಇಲ್ಲೆ. ವರ್ಷದಂಗ್ ಮಾಡು ಒಂದ್ ಬ್ಯಾಸಾಯಕ್ ,ವರ್ಷಾವಧಿ  ಜೋಡ್ ಎಂತಕ್ ಸಾಂಕುದ್? ಟಿಲ್ಲರ್,ಟ್ರ್ಯಾಕ್ಟರ್ ,ಎಲ್ಲ ಬಂದ್ ಹೂಂಟಿ ಮಾಡು ಸಮೆಗ್ ಜೋಡು ಬ್ಯಾಡ ಅಲ್ದಾ? ಮೊದಲೆಲ್ಲ ಹೋರಿ ಜೋಡ್ ಸಾಂಕುದ್ ಮನೆಗೊಂದ್ ಗೌರವ! ಹಟ್ಟಿಗ್ ಒಂದು ಮರ್ಯಾದೆ. ಇರ್ಲಿ…*ಹಿಂದಿನ್ ಕಾಲ್ವಲ್ಲ,ವಂಡಾರ್ ಕಂಬ್ಳಲ್ಲ*!!
ಹೋರಿ ಜೋಡ್ ಕಟ್ಕಂಡ್ ಗೆದ್ದಿ ಹೂಂಟಿ ಮಾಡು ಸುರಿಗೆ, ಬೇಜಾರ್ ಕಳುಕೆ ನಮ್  ಹೂಂಟಿ ಆಳ್  ಬಾಯಂಗೆ ಪದು ಹೇಳ್ತಿದ್ರ್. ಆ ಜನಪದ ಹಾಡಿನ ಪ್ರಕಾರಕ್ಕೆ *ಒಳಲ್* ಅಂದ್ ಹೇಳ್ತಿದ್ರ್. ಹೂಂಟಿ ಮಾಡು ಆಳ್ ಅದನ್ ರಾಗ್ವಾಯಿ ಹೇಳುದ್ ,ಆ ರಾಗಕ್ ಸಮ್ನಾಯ್ ಜೋಡ್ ಹೆಜ್ಜಿ ಹಾಕ್ತಿದ್ದೊ.

ಹೋರಿಗ್ ಎಡಕ್ ಹೋಗ್ ಅಂಬ್ಕೆ ಹೋರ್ ಎಡ್ದಾ…ಹುಂ….ಬಾ…ಊಓ….ಅಂತ್ರ್.ಬಲ್ದಾ ಬದಿಗ್ ತಿರ್ಗುಕ್…ಬಲ್ದಾ….ಹುಂ…ಬಾ….ಊಓ…ಅಂತಿದ್ರ್…ಹುಂ……..ಬಾ….ಅಂದ್ರೆ..ನಿಧಾನಕ್ ಹೋಗ್ ಅಂದೇಳಿ ಅರ್ಥ!
ಕಾಣಿ ಇಲ್ ಕೆಲವ್ ಒಳಲ್ ಬರ್ದಿದಿ. ಇದ್ ನಮ್ಮನಿಯಲ್ ನಾ ಚಣ್ಣಕ್ಕಿಪ್ಪತ್ತಿಗ್ ವರ್ಷಾವಧಿ ಕೆಲ್ಸಕ್ಕಿದ್ದ್ ಆಳು * ಮಂಜು* ಹಾಂಡ್ರ್ ರಾಗವಾಯಿ ಹೇಳ್ತಿದ್ ಒಳಲ್. ಅನಕ್ಷರಸ್ಥ ಮಂಜುಗೆ ಮಕ್ಕಳು ಮತ್ತು ಗಂಟಿ ಅಂದ್ರೆ ಮಸ್ತ್ ಪ್ರೀತಿ. ಅವರ ಬಗ್ಗೆ ಇನ್ನೊಂದು ದಿನ ಬರಿತೆ. ಅವರ ಬಾಯಲ್ಲಿ ನಾ ಕೇಳಿದ ಒಳಲ್ ಈಗಳೂ ಕೇಂಡೆ ಕೇಂಡೆ ಅಮೆಗ್ ಇತ್. ಮಂಜು ತೀರಿ ಹೋಗಿಯೇ ಹತ್ ವರ್ಷದ್ ಮೇಲಾಯ್ತ್.

ಈ ಒಳಲ್ ನಲ್ ಬಪ್ಪು ಪ್ರಕೃತಿಯ ವರ್ಣನೆ, ಪ್ರಾಣಿ ಪ್ರೀತಿ, ನದಿ ಬಯಲುಗಳ ಸೊಬಗಿನ ಸಹಜ ಸರಳ ವರ್ಣನೆ , ಪ್ರಾಸದ ಬಳಕೆ ಎಲ್ಲವೂ ಮನೋಜ್ಞವಾಗಿದೆ.

ಕೆರೆಯ ಸುತ್ತ ಕ್ಯಾದಿಗಿಯೊ…ಮನೆಯ ಸುತ್ತ ಮಲ್ಲಿಗಿಯೋ..ಊಓ….ಉಂ…ಬಾ…||
ಮೂಡಲಿಂದ್ ಮುಗಿಲೆತ್ತ…ಮುನ್ನೂರಾರ್ ಹನಿಬಿತ್ತಾ….ಊಓ……ಉಂ…ಬಾ…||
ಎತ್ತಿನ ಕೊರಳಲ್ಲಿ…..ಮುತ್ತಿನ ಸರಗೆಜ್ಜಿಯೋ…ಊಓ….ಉಂ…ಬಾ…||
ಹೊಲದಲ್ಲಿ ಹುಲ್ಲುಂಟೋ…..ಬಲ್ಲೆಯಲಿ ಹುಲಿಯುಂಟೋ….ಊಓ….ಉಂ…ಬಾ….||
ಕಾಕಿ ಕರಿತ್ತೋ…ಕಾಣ್..ಕರ್ಜುರದ್ ಹಣ್ಣಿಗಾ ಕಾಣ್…ಊಓ…..ಉಂ….ಬಾ||

ಇವಿಷ್ಟ್ ನನ್ ಮಕ್ಳಾಟಿಕೆಯಲ್ ನಾ ಬರ್ದ್ ಬೆಚ್ಕಂಡ್ ಒಳಲ್…ಹೀಂಗಿದ್ ಮೂನ್ನೂರಾರ್ ಹಾಡ್ ಬತ್ತಿತ್ ನಮ್ ಮಂಜ್ವಣ್ಣಂಗೆ. 
ವೈಶಾಖದ ದಿನದಲ್ ಬೆಳ್ಗಿನ್ ಜಾಮದಂಗೆ ಹೂಂಟಿ ಕಟ್ಟಿ, ಧಾನ್ಯಗಳ ನ್ ಹಾಕುಕೆ, ಮಂಜು ನಮ್ ಮೂಡ್ಲಮಕ್ಲಿ  ಬೈಲಲ್ ಒಳಲ್ ಹಾಡಿದ್ರೆ, ಬಿದ್ಕಲ್ಕಟ್ಟೆ ಏರಿನಗ್ ಹೋಪರಿಗೆ, ಇತ್ ಹಾಲಾಡಿ ಗೋಳಿಕಟ್ಟೆ ದಾರಿಯಂಗ್ ಸಿಕ್ಕು ಬ್ರಹ್ಮಸ್ಥಾನದ್ ಏರಿಗೆ, ಅತ್ ಸೌಡದ್ ಗಾಡಿ ಪರ್ಟಿನ್ ಕೋಣೆಹರದ ಏರಿನ ಮೇಲ್ ಹೋಪ್ವರಿಗೆಲ್ಲ …ಮಂಜ್ವಣ್ಣ ಹೂಡ್ ಕಟ್ಟಿದ್ ಗೊತಾತಿತ್. ಅಷ್ಟ್ ಒಳ್ಳೆಯ ಕಂಚಿನ್ ಕಂಠ! ನಿಶ್ಯಬ್ಧ ಮುಂಜಾವಿಗೆ ಹಸಿಯಂಗ್ ಮಲ್ಕಂಡಿಪ್ ಚಣ್ ಮಕ್ಕಳಿಗೆಲ್ಲ, ಮಂಜ್ವಣ್ಣ ಬಯಲಂಗ್ ಹೇಳ್ತಿದ್ ಒಳಲ್ ಜೋಗುಳ ಹಾಡಿದಾಂಗ್ ಆತಿದ್ದದ್ದಂತೂ ಸುಳ್ಳಲ್ಲ.!!

ವಿಶ್ವ ಕುಂದಾಪ್ರ ಕನ್ನಡ ದಿನಾಚರಣೆ ಈ ದಿನ ಹೀಂಗಿದ್ದೆಲ್ಲಾ ಜನಪದ  ಸಾಹಿತ್ಯ ನಮ್  ತಿರಿಯಂಗ್ ಇತ್ ಅಂದ್ ಹಂಬ್ಲ್  ಮಾಡ್ಕಂಬ್  ಹಾಂಗ್ ಆದ್ ಮಸ್ತ್ ಖುಷಿ. ಎಲ್ಲರಿಗೂ ವಿಶ್ವ ಕುಂದಾಪ್ರ ಕನ್ನಡ ದಿನದ ಶುಭಾಶಯಗಳು.