ಭಟ್ಕಳ ಮಸೀದಿ ಸದಸ್ಯರಿಂದ ಪೇಜಾವರ ಮಠಕ್ಕೆ ಭೇಟಿ
ಉಡುಪಿ: ಭಟ್ಕಳ ಜಾಮಿಯಾ ಇಸ್ಲಾಮಿಯಾ ಅರೆಬಿಕ್ ಮಹಾ ವಿದ್ಯಾಲಯದವರು ಉಡುಪಿ ರಥಬೀದಿಯಲ್ಲಿರುವ ಪೇಜಾವರ ಮಠಕ್ಕೆ ಮಂಗಳವಾರ ರಾತ್ರಿ ಭೇಟಿ ನೀಡಿ ಇತ್ತೀಚೆಗೆ ಕೃಷ್ಣೈಕ್ಯರಾದ ಉಡುಪಿ ಪೇಜಾವರ ಶ್ರೀ ವಿಶ್ವೇಶತೀರ್ಥ ಸ್ವಾಮೀಜಿ ಅವರಿಗೆ ಸಂತಾಪ ಸಲ್ಲಿಸಿದರು.
ಈ ವೇಳೆ ಮಠದಲ್ಲಿದ್ದ ಪೇಜಾವರ ಶ್ರೀ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಅವರನ್ನು ಭೇಟಿಯಾಗಿ ಮಾತುಕತೆ ನಡೆಸಿದರು. ಸರ್ವಧರ್ಮವನ್ನು‌ಗೌರವಿಸುತಿದ್ದ ಯತಿಗಳು ದೇಶಕ್ಕೆ ಮಾದರಿ ಸಂತನಾಗಿದ್ದರು. ಶ್ರೀಗಳ ನಿಧನದಿಂದ ಸಾಮಾಜಿಕ, ಸಾಂಸ್ಕೃತಿಕ, ಧಾರ್ಮಿಕ, ಶೈಕ್ಷಣಿಕ ಕ್ಷೇತ್ರಕ್ಕೆ ತುಂಬಲಾರದ ನಷ್ಟ. ಈ ಹಿಂದೆ ನಮ್ಮ ಸಂಸ್ಥೆಗೆ ಭೇಟಿ ನೀಡಿ ಶ್ರೀಗಳು ಆಶಿರ್ವಚನ ನೀಡಿದ್ದು ನಮಗೆಲ್ಲರಿಗೂ ಬಹಳ ಸಂತಸವಾಗಿತ್ತು. ದೇವರು ಅವರ ಆತ್ಮಕ್ಕೆ ಚಿರಶಾಂತಿ ಕರುಣಿಸಲು, ಶ್ರೀಗಳ ಆಗಲಿಕೆಯ ದುಃಖದಲ್ಲಿ ನಮ್ಮ ಸಂಸ್ಥೆಯ ಅಧ್ಯಾಪಕ ವರ್ಗ, ವಿದ್ಯಾರ್ಥಿಗಳು, ಶಿಕ್ಷಕ ವೃಂದ ಭಾಗಿಯಾಗಿದೆ ಎಂದು ನುಡಿ ನಮನ ಸಲ್ಲಿಸಿದರು.
ಸಮಾಜದಲ್ಲಿ ಒಟ್ಟಿಗೆ ಇರುವ ನಾವು, ನಮ್ಮ ಉತ್ಸವದಲ್ಲಿ ನೀವು ಪಾಲ್ಗೊಳ್ಳುವುದು, ನಿಮ್ಮ ಉತ್ಸವದಲ್ಲಿ ನಮ್ಮ ಸಮಾಜದವರು ಪಾಲ್ಗೊಂಡು ನಮ್ಮಲ್ಲಿರುವ ಅಪನಂಬಿಕೆ ದೂರ ಆಗುವ ದಿನವನ್ನು ಎದುರು ನೋಡುತ್ತಿದ್ದೇನೆಂದು ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಅಭಿಪ್ರಾಯಪಟ್ಟರು. ಸಮಾಜದಲ್ಲಿ ಸೌಹಾರ್ದತೆ ಅತ್ಯವಶ್ಯವಾಗಿದೆ ನಿಮ್ಮ ಸಮಾರಂಭಕ್ಕೆ ಕರೆದರೆ ಖಂಡಿತಾವಾಗಿ ಬರುತ್ತೇನೆ ಎಂದರು.
