ಬೈಂದೂರು: ದನ ಕಳವು- ದೂರು ದಾಖಲು
ಬೈಂದೂರು ಎ.1(ಉಡುಪಿ ಟೈಮ್ಸ್ ವರದಿ): ಇತ್ತೀಚಿಗೆ ಆದ ದನ ಕಳವು ಪ್ರಕರಣದ ವಿಡಿಯೋ ವೈರಲ್ ವಿಚಾರಕ್ಕೆ ಸಂಬಂಧಿಸಿ ಟಿಪ್ಪರ್ ಲಾರಿ ಚಾಲಕರೊಬ್ಬರು ಬೈಂದೂರು ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ.
ಟಿಪ್ಪರ್ ಲಾರಿ ಚಾಲಕ ವಸಂತ ಪೂಜಾರಿ ಅವರು ಮಾ.26 ರಂದು ತಮ್ಮ ಕೆಲಸ ನಿರ್ವಹಿಸಿ ಮಾ.27 ರಂದು ನಸುಕಿನ ವೇಳೆ ಮನೆಗೆ ಹೋಗುತ್ತಿರುವಾಗ ನೀರ್ಗದ್ದೆ ಕ್ರಾಸ್ ನ ಹೊಟೇಲ್ ಸಮೀಪ ಕಾರಿನ ಬಳಿ 3-4 ಜನರು ನಿಂತುಕೊಂಡಿದ್ದು ಇವರ ಲಾರಿಯ ಹೆಡ್ ಲೈಟ್ ಬೆಳಕನ್ನು ನೋಡಿ ಆರೋಪಿಗಳು ಕಾರು ಹತ್ತಿ ನೀರ್ಗದ್ದೆ ಪೆಟ್ರೋಲ್ ಬಂಕ್ ಕಡೆಗೆ ಕಾರನ್ನು ಚಲಾಯಿಸಿಕೊಂಡು ಕುಂದಾಪುರ ಕಡೆಗೆ ಹೋಗಿದ್ದಾರೆ.
ಈ ನಡುವೆ ಕಾರಿನಲ್ಲಿ ದನಗಳನ್ನು ತುಂಬಿಸಿಕೊಂಡು ಹೋದ ವಿಡಿಯೋ ವೈರಲ್ ಆದ ಬಗ್ಗೆ ತಿಳಿದ ಲಾರಿ ಚಾಲಕ ವಸಂತ ಪೂಜಾರಿ ಅವರು ವಿಡಿಯೋವನ್ನು ನೋಡಿದಾಗ ನೀರ್ಗದ್ದೆ ಬಳಿ ನೋಡಿದ ಕಾರಿನಲ್ಲಿಯೇ 3-4 ಜನ ಆರೋಪಿಗಳು ರಸ್ತೆಯ ಬದಿಯಲ್ಲಿ ಮಲಗಿದ್ದ ದನಗಳನ್ನು ಕಳವು ಮಾಡಿಕೊಂಡು ಹೋಗಿರುವುದಾಗಿ ನೀಡಿದ ದೂರಿನಂತೆ ಬೈಂದೂರು ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
