ಮೂಡುಬಿದಿರೆ: ಮಹಿಳೆ ಧ್ವನಿಯಲ್ಲಿ ಕರೆ, ಬ್ಲಾಕ್ ಮೇಲ್- ಯುವಕ ಬಂಧನ
ಮೂಡುಬಿದಿರೆ ಫೆ.25 : ಮಹಿಳೆಯ ಧ್ವನಿಯಲ್ಲಿ ಕರೆಮಾಡಿ, ವಿಡಿಯೋ ಕಾಲ್ ಮೂಲಕ ಖಾಸಗಿ ಅಂಗಗಳನ್ನು ಪ್ರದರ್ಶಿಸಿ ವ್ಯಕ್ತಿಯೊಬ್ಬರಿಂದ ಹಣ ಸುಲಿಗೆ ಮಾಡುತ್ತಿದ್ದ ಆರೋಪಿ ಯುವಕನ್ನು ಪೊಲೀಸರು ಬಂಧಿಸಿದ್ದಾರೆ.
ಮೂಡುಬಿದಿರೆ ಸಮೀಪದ ಬಿರಾವಿನ ಧನಂಜಯ ಬಂಧಿತ ಆರೋಪಿ. ಬೈಕಂಪಾಡಿಯ ಖಾಸಗಿ ಕಂಪನಿಯೊಂದರ ಉದ್ಯೋಗಿ ಹೊಸಬೆಟ್ಟುವಿನ ನಿವಾಸಿ ನವೀನ್‌ ಚಂದ್ರ ಹಣ ಕಳೆದುಕೊಂಡ ವ್ಯಕ್ತಿ.
ನವೀನ್‌ ಚಂದ್ರ ಅವರಿಗೆ ಇತ್ತೀಚೆಗೆ ಉಷಾ ಎಂಬ ಹೆಸರಿನ ಅಪರಿಚಿತ ಮಹಿಳೆಯಿಂದ ಕರೆ ಬಂದಿತ್ತು. ನವೀನ್‌ ಚಂದ್ರ ಅವರು ಕರೆ ಮಾಡಿದ್ದು ಮಹಿಳೆ ಎಂದು ನಂಬಿ ಪರಿಚಯಿಸಿಕೊಂಡು ಸಲುಗೆ ಬೆಳೆಸಿ ವೀಡಿಯೊ ಕಾಲ್ ಮಾಡಿ ಮಾತನಾಡುತ್ತಿದ್ದರು. ಈ ಸಂದರ್ಭದಲ್ಲಿ ಉಷಾ ಎಂದು ಕರೆ ಮಾಡಿದ ವ್ಯಕ್ತಿ ಹುಡುಗಿಯ ಖಾಸಗಿ ಅಂಗಗಳನ್ನೆಲ್ಲ ತೋರಿಸುತ್ತಿದ್ದ. ಕೊನೆಗೆ ಇದೇ ವೀಡಿಯೊ ಕಾಲ್‌ಗಳನ್ನು ಇಟ್ಟುಕೊಂಡು ಹಣ ಕೇಳಿ ಬ್ಲಾಕ್‌ಮೇಲ್ ಮಾಡತೊಡಗಿದ. ಆರಂಭದಲ್ಲಿ ನವೀನ್‌ಚಂದ್ರ ಉಷಾಗೆ 2 ಸಾವಿರ ರೂ. ಗೂಗಲ್ ಪೇ ಮಾಡಿದ್ದರು. ಆದರೆ ಉಷಾ ಬೇಡಿಕೆ ದಿಢೀರ್ 25 ಸಾವಿರಕ್ಕೇರಿದಾಗ ಕಂಗಾಲಾದ ನವೀನ್‌ಚಂದ್ರ ಅವರು ಸುರತ್ಕಲ್ ಪೊಲೀಸರಿಗೆ ದೂರು ನೀಡಿದರು.
ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಫೋನ್ ಕರೆಯ ಬೆನ್ನತ್ತಿದ್ದಾಗ ಉಷಾ ಎನ್ನುವುದು ಓರ್ವ ಗಂಡಸು ಎಂಬುದು ಪತ್ತೆಯಾಯಿತು. ಸದ್ಯ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ತಿಳಿದು ಬಂದಿದೆ.
