ಹೆಬ್ರಿ-ಪರ್ಕಳ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಗೆ ಮರಗಳ ಮಾರಣ ಹೋಮ: ಪರಿಸರ ಪ್ರೇಮಿಗಳಿಂದ ಆಕ್ಷೇಪ

ಉಡುಪಿ ಡಿ.21 : ಜಿಲ್ಲೆಯ ಹೆಬ್ರಿ-ಪರ್ಕಳ ರಾಷ್ಟ್ರೀಯ ಹೆದ್ದಾರಿ ಕಾಮಗಾರಿಗಾಗಿ ಎಗ್ಗಿಲ್ಲದೆ ಮರಗಳ ಮಾರಣ ಹೋಮ ನಡೆಯುತ್ತಿದ್ದು ಈ ಬಗ್ಗೆ ಆತಂಕ ವ್ಯಕ್ತಪಡಿಸಿರುವ ಪರಿಸರ ಪ್ರೇಮಿಗಳು ಮರಗಳ ತೆರವಿಗೆ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಅಭಿವೃದ್ಧಿ ಕಾರ್ಯಗಳಿಂದಾಗಿ ಪಶ್ಚಿಮ ಘಟ್ಟಗಳಂತಹ ಸೂಕ್ಷ್ಮ ಪ್ರದೇಶದ ಜೀವ ವೈವಿಧ್ಯಕ್ಕೆ ಮಾರಕವಾಗುತ್ತಿರುವ ಬಗ್ಗೆ ಪರಿಸರ ಪ್ರೇಮಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ಜಾಗೃತಿ ಮೂಡಿಸುತ್ತಿದ್ದಾರೆ. ಅಲ್ಲದೆ ಹೆಬ್ರಿಯಿಂದ ಪರ್ಕಳದವರೆಗೆ ಚತುಷ್ಪಥ ಹೆದ್ದಾರಿಯ ಹೆಸರಿನಲ್ಲಿ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ಸಾವಿರಾರು ಬಲಿತ ಪಾರಂಪರಿಕ ಮರಗಳನ್ನು ಕಡಿಯಲು ಮುಂದಾಗಿದೆ. ಇದಕ್ಕೆ ಸಂಬಂಧಿಸಿದ ಕಾನೂನು ನಿಯಮಗಳನ್ನು ಮೀರಿ ಲಾಭದ ವ್ಯವಹಾರವನ್ನು ವಿಸ್ತರಿಸಲು ಹೆದ್ದಾರಿ ಪ್ರಾಧಿಕಾರಗಳು ಮುಂದಾಗಿದೆ. ಇದಕ್ಕಾಗಿ ಸಂರಕ್ಷಿತ ಅರಣ್ಯ ಪ್ರದೇಶಗಳನ್ನು ಹೊರತು ಪಡಿಸಿ ಉಳಿದ ಪ್ರದೇಶದಲ್ಲಿ ಎಗ್ಗಿಲ್ಲದೇ ಸಾಲು ಸಾಲು ಮರ ಕಡಿಯುವ ಕೆಲಸ ನಡೆಯುತ್ತಿದೆ. ಇದು ಸೋಮೇಶ್ವರ ಅಭಯಾರಣ್ಯದ ಒಳಗೂ ಲಕ್ಷಾಂತರ ಮರಗಳನ್ನು ಕಡಿಯಲು ನಡೆಸಿದ ಪೂರ್ವ ತಯಾರಿಯಂತೆ ಕಾಣುತ್ತಿದೆ ಆದ್ದರಿಂದ ಈ ಬಗ್ಗೆ ಸಾರ್ವಜನಿಕ ಆಕ್ಷೇಪಣೆ ಸಲ್ಲಿಸಲು ಡಿ.22 ಕೊನೆಯ ದಿನಾಂಕವಾಗಿದ್ದು, ಈ ಕುರಿತು ಅರಣ್ಯ ಇಲಾಖೆಗೆ ಆಕ್ಷೇಪಣೆ ಕಳುಹಿಸಿ ಪಶ್ಚಿಮ ಘಟ್ಟಗಳನ್ನು ಉಳಿಸಲು ನೆರವಾಗುವಂತೆ ಪರಿಸರ ಪ್ರೇಮಿಗಳು ಮನವಿ ಮಾಡಿಕೊಂಡಿದ್ದಾರೆ.

ರಸ್ತೆ ಅಗಲೀಕರಣದ ನೆಪದಲ್ಲಿ ನೂರಾರು ವರ್ಷಗಳ ಹಳೇಯ ಮರಗಳನ್ನು ಕಡಿಯುವುದು ಸಾಮಾಜಿಕ ನ್ಯಾಯವಲ್ಲ. ಜೊತೆಗೆ ಈ 1500 ಚಿಲ್ಲರೆ ಮರಗಳಲ್ಲಿ ಅಸಂಖ್ಯವಾದ ಜೀವಿವೈವಿಧ್ಯ ಪ್ರಬೇಧಗಳು ಬಾಳಿ ಬದುಕುತ್ತಿದ್ದು, ಈ ಭಾಗದಲ್ಲಿ ಮರಗಳ ತೆರವಿಗೆ ಅನುಮತಿ ನೀಡಿದರೆ ಈ ಅಸಂಖ್ಯ ಜೀವಿ ವೈವಿಧ್ಯಗಳು ನೆಲೆಯಿಲ್ಲದೇ ನಾಶವಾಗುವ ಸಾಧ್ಯತೆ ಇದೆ. ಈ ಬಗ್ಗೆ ಯಾವುದಾದರೂ ಪರ್ಯಾಯ ಮಾರ್ಗಗಳ ಬಗ್ಗೆ ಯೋಚಿಸಲಾಗಿದೆಯೇ? ಎಂದು ಪ್ರಶ್ನಿಸಿದ್ದಾರೆ.

ಹೆಬ್ರಿ-ಪರ್ಕಳ ರಾಷ್ಟ್ರೀಯ ಹೆದ್ದಾರಿ(169ಎ) ಕಾಮಗಾರಿಗಾಗಿ ಹೆಬ್ರಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೆಳಪೇಟೆಯಿಂದ ಕೊಳಗುಡ್ಡೆಯವರೆಗೆ 862 ಮರಗಳನ್ನು ಹಾಗೂ ಶಿವಪುರ ಗ್ರಾಮಪಂಚಾಯ್ತಿ ವ್ಯಾಪ್ತಿಯ ಕೊಳಗುಡ್ಡೆಯಿಂದ ಮುಳ್ಳುಗುಡ್ಡೆಯವರೆಗೆ 580 ವಿವಿಧ ಜಾತಿಯ ಮರಗಳನ್ನು ತೆರವುಗೊಳಿಸುವ ಕುರಿತು ಆಕ್ಷೇಪಣೆ ಸಲ್ಲಿಸಿದ್ದು, ಉದ್ದೇಶಿತ ರಾಷ್ಟ್ರೀಯ ಹೆದ್ದಾರಿಯು ಪಶ್ಚಿಮಘಟ್ಟಗಳ ಸೂಕ್ಷ್ಮ ಪ್ರದೇಶದಲ್ಲಿ ಬರುತ್ತಿದೆ. ಪಾರಂಪಾರಿಕ ಮರಗಳನ್ನು ಕತ್ತರಿಸಿ ತೆಗೆಯುವುದರಿಂದ ಗುಡ್ಡ ಕುಸಿತವಾಗುವ ಸಂಭವವಿರುತ್ತದೆ. ಹಾಲಿ ಇರುವ ರಸ್ತೆಯ ಅಗಲವನ್ನು ದುರಸ್ತಿ ಮಾಡಿ, ಉತ್ತಮ ರೀತಿಯಲ್ಲಿ ನಿರ್ವಹಣೆ ಮಾಡಿದಲ್ಲಿ ಸುಮಾರು 1,500 ಮರಗಳನ್ನು ಕಡಿಯುವ ಪ್ರಮೇಯವೇ ಬರುವುದಿಲ್ಲ. ಅಲ್ಲದೆ, ಪಶ್ಚಿಮಘಟ್ಟಗಳು ಜಾಗತಿಕ ಮಹತ್ವ ಹೊಂದಿರುವುದು ಜೊತೆಗೆ ವಿಶ್ವಪಾರಂಪಾರಿಕ ತಾಣವೆಂದು ಘೋಷಿಸಲಾದ ಪ್ರದೇಶಗಳಲ್ಲಿ ಅನಗತ್ಯವಾಗಿ ಮರಗಳನ್ನು ಕಡಿಯುವುದು ಮಾನವೀಯತೆಗೆ ವಿರುದ್ಧವಾಗುತ್ತದೆ ಎಂದು ಹೇಳಿದ್ದಾರೆ.

ಪಶ್ಚಿಮ ಬಂಗಾಳದಲ್ಲಿ ರೈಲ್ವೇ ಓವರ್ ಬ್ರಿಡ್ಜ್ ನಿರ್ಮಿಸಲು 356 ಪಾರಂಪಾರಿಕ ಮರಗಳನ್ನು ತೆರವು ಮಾಡುವುದಿತ್ತು. ಅಲ್ಲಿನ ಸ್ವಯಂಸೇವಾ ಸಂಸ್ಥೆಯೊಂದು ಪಾರಂಪಾರಿಕ ಮರಗಳನ್ನು ಕಡಿಯಬಾರದು ಎಂದು ಸರ್ವೋಚ್ಚ ನ್ಯಾಯಾಯಲಯದ ಮೊರೆಹೋಯಿತು. ಈ ಬಗ್ಗೆ 2021ರ ಫೆಬವರಿಯಲ್ಲಿ ಸರ್ವೋಚ್ಛ ನ್ಯಾಯಾಲಲಯ ನೀಡಿದ ಆದೇಶದಂತೆ, 356 ಮರಗಳ ನೈಸರ್ಗಿಕ ಸೇವೆಯನ್ನು ಗುರುತಿಸಲು ಉನ್ನತ ಮಟ್ಟದ ಸಮಿತಿಯೊಂದನ್ನು ರಚಿಸಲಾಯಿತು. ಸುಮಾರು 6 ತಿಂಗಳ ಕಾಲ ಸಮಗ್ರ ಅಧ್ಯಯನ ನಡೆಸಿದ ಸಮಿತಿಯು, ಯಾವುದೇ ಅಭಿವೃದ್ಧಿ ಹಿನ್ನೆಲೆಯಲ್ಲೂ ಪಾರಂಪಾರಿಕ ಮರಗಳನ್ನು ಕಡಿಯುವುದು ಸೂಕ್ತವಲ್ಲ. ಅವುಗಳ ನೈಸರ್ಗಿಕ ಸೇವೆಯ ಮೊತ್ತ ರೂ.74,50000 ಮೌಲ್ಯವಾಗುತ್ತದೆ ಆದ್ದರಿಂದ ಯಾವುದೇ ಕಾರಣಕ್ಕೂ ಮರಗಳನ್ನು ಕಡಿಯುವುದು ಸೂಕ್ತವಾದ ನಿರ್ಧಾರವಾಗುವುದಿಲ್ಲವೆಂದು ವರದಿ ನೀಡಿತ್ತು. ಆದ್ದರಿಂದ ರಸ್ತೆ ಅಗಲೀಕರಣಕ್ಕಾಗಿ ಮರ ಕಡಿಯುವುದು ಅನಿವಾರ್ಯವಾದರೆ ಒಂದು ಮರಕ್ಕೆ 74,50,000 ರೂ. ನಂತೆ ಒಟ್ಟು 1500 ಮರಗಳಿಗೆ 11,175,000,000 ಮೊತ್ತವನ್ನು ಉಪಯೋಗಿ ಸಂಸ್ಥೆಯಿಂದ ಭರಿಸಿಕೊಂಡು ಮರ ಕಡಿಯಲು ಅನುಮತಿ ನೀಡಬಹುದು ಹಾಗೂ ಭರಿಸಿಕೊಂಡ ಹಣವನ್ನು ಮರಗಳನ್ನು ಸ್ಥಳಾಂತರಿಸುವುದು ಮತ್ತೆ ಬೆಳೆಸುವುದು ಹಾಗೂ ಪರ್ಯಾಯ ಕಾಡು ನಿರ್ಮಿಸುವ ಕೆಲಸಕ್ಕೆ ಬಳಸಿಕೊಳ್ಳಬೇಕು ಎಂದು ಸಲಹೆ ನೀಡಿದ್ದಾರೆ.

ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ಒಂದು ಲಾಭಕೋರ ಸಂಸ್ಥೆಯಂತೆ ವರ್ತಿಸುತ್ತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿರುವ ಪರಿಸರ ಪ್ರೇಮಿಗಳು, ಪ್ರಾಧಿಕಾರಕ್ಕೆ ಯಾವುದೇ ನೈಸರ್ಗಿಕ ಕಾಳಜಿ ಇರುವುದಿಲ್ಲ. ಇದಕ್ಕೆ ಸರ್ವೋಚ್ಚ ನ್ಯಾಯಾಲಯದ ಆದೇಶದಂತೆ ನಾಗಪುರದ ಎನ್.ಎಚ್-7ರಲ್ಲಿ ಕಡಿದ 20,500 ಬಲಿತ ಪಾರಂಪಾರಿಕ ಮರಗಳ ಬದಲಾಗಿ 1,11,000 ಸಸಿಗಳನ್ನು ನೆಟ್ಟು ಬೆಳಸಬೇಕಿತ್ತು. ಆದರೆ ಫೆಬ್ರವರಿ 2022 ರಂದು ಸ್ಥಳ ಪರಿಶೀಲನೆ ಮಾಡಿದ ಸರ್ಕಾರೇತರ ಸಂಸ್ಥೆಯು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು ನೆಟ್ಟ 1,11,000 ಗಿಡಗಳಲ್ಲಿ ಒಂದು ಗಿಡವೂ ಉಳಿದಿಲ್ಲವೆಂದು ಬಹಿರಂಗ ಪಡಿಸಿರುವುದು ಉತ್ತಮ ಉದಾಹರಣೆಯಾಗಿದೆ. ಹೀಗಾಗಿ ಅಭಿವೃದ್ಧಿ ಹೆಸರಿನಲ್ಲಿ ಹೀಗೆ ಮರಗಳ ನಾಶ ನಡೆಯುತ್ತಿದ್ದರೆ ಮುಂಬರುವ ಬೇಸಿಗೆಯಲ್ಲಿ ಭಾರತವನ್ನು ಬಿಸಿ ಸುನಾಮಿಯು ಬಾಧಿಸಲಿದೆ. ಇದು ಭಾರತೀಯರ ಬದುಕುವ ಸಾಮಥ್ರ್ಯದ ಮಿತಿಯನ್ನೇ ಕುಂಠಿತಗೊಳಿಸಲಿದೆ. ಅಲ್ಲದೆ ಭಾರತದ ಬಡವರು, ನಿರ್ಲಕ್ಷಿತರು, ಮಧ್ಯಮ ವರ್ಗದವರು, ಮಹಿಳೆಯರು, ವೃದ್ಧರು, ಮಕ್ಕಳು ಬೇಸಿಗೆಯ ಬಿಸಿಗಾಳಿಯ ಹೊಡೆತಕ್ಕೆ ಸಿಲುಕಲಿದ್ದಾರೆ ಎಂದು ವಿಶ್ವ ಬ್ಯಾಂಕ್ ಗಂಭೀರವಾಗಿ ಎಚ್ಚರಿಸಿದೆ. ಆದ್ದರಿಂದ ಯಾವುದೇ ಕಾರಣಕ್ಕೂ ಮರಗಳನ್ನು ತೆರವು ಮಾಡಲು ಯಾವುದೇ ಕಾರಣಕ್ಕೂ ಅನುಮತಿ ನೀಡಲೇ ಬಾರದು ಎಂದು ತಮ್ಮ ಆಕ್ಷೇಪನೆಯನ್ನು ಸಲ್ಲಿಸಿದ್ದಾರೆ.