ಬೈಂದೂರು: ಮನೆಗೆ ನುಗ್ಗಿ ಮನೆಯ ಸದಸ್ಯರಿಗೆ ಹಲ್ಲೆ

ಬೈಂದೂರು ಜೂ.27 (ಉಡುಪಿ ಟೈಮ್ಸ್ ವರದಿ) : ಬೈಂದೂರಿನ ನಾವುಂದ ಗ್ರಾಮದಲ್ಲಿ ತಂಡವೊಂದು ಮನೆಗೆ ನುಗ್ಗಿ ಮನೆಯ ಸದಸ್ಯರಿಗೆ ಹಲ್ಲೆ ಮಾಡಿ ಬೆದರಿಕೆ ಹಾಕಿರುವ ಘಟನೆ ನಡೆದಿದೆ.

ಈ ಬಗ್ಗೆ ನಾವುಂದ ಗ್ರಾಮದ ಫಾತೀಮಾ ಮುನೀರ್ ಎಂಬವರು ಪೊಲೀಸರಿಗೆ ದೂರು ನೀಡಿದ್ದು, ಜೂ.25 ರಂದು ರಾತ್ರಿ ವೇಳೆ ಫಾತೀಮಾ ಅವರ ಮನೆಗೆ ಬೈಕ್ ಹಾಗೂ ಕಾರಿನಲ್ಲಿ ಆರೋಪಿ ಅಲ್ಪಾಜ್ ಮತ್ತು ಇತರ 11 ಜನರ ತಂಡ ಬಂದಿದ್ದು, ಈ ಪೈಕಿ 4 ಜನರು ಮಾರಕಾಯುಧಗಳೊಂದಿಗೆ ಮನೆಯೊಳಗೆ ನುಗ್ಗಿ ಫಾತೀಮಾ ಅವರ ಗಂಡನಿಗೆ ಅವಾಚ್ಯ ಶಬ್ಧಗಳಿಂದ ಬೈದು ಕರೆದಿದ್ದಾರೆ. ಈ ವೇಳೆ ಫಾತಿಮಾ ಅವರು ಸ್ಥಳಕ್ಕೆ ಬಂದು ಗಂಡನಿಗೆ ಹೊಡೆಯುವುದನ್ನು ತಪ್ಪಿಸಲು ಹೋದಾಗ ಅವರಿಗೂ ಹಲ್ಲೆ ಮಾಡಿದ್ದು, ಈ ಗಲಾಟೆಯಲ್ಲಿ ಫಾತೀಮಾ ಅವರ ಧರಿಸಿದ್ದ ಚಿನ್ನದ ಚೈನ್ ಹಾಗೂ ಉಂಗುರ ಬಿದ್ದು ಹೋಗಿದೆ. ಮಾತ್ರವಲ್ಲದೆ ಅಲ್ಲಿಗೆ ಬಂದ ಫಾತೀಮಾ ಅವರು ತಂದೆ ಹಾಗೂ ಅಣ್ಣ ನಿಗೂ ಆರೋಪಿಗಳು ಹಲ್ಲೆ ಮಾಡಿದ್ದಾರೆ ಹಾಗೂ ಬೆದರಿಕೆ ಹಾಕಿ ಪರಾರಿಯಾಗಿದ್ದಾರೆ ಎಂಬುದಾಗಿ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಲಾಗಿದೆ. ಈ ಬಗ್ಗೆ ಬೈಂದೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.