ಉಡುಪಿ: ನಗರದಲ್ಲಿ ಮತ್ತೆ ಎರಡು ದ್ವಿಚಕ್ರ ವಾಹನ ಕಳವು
ಉಡುಪಿ ಮೇ 18 (ಉಡುಪಿ ಟೈಮ್ಸ್ ವರದಿ): ನಗರದಲ್ಲಿ ಪಾರ್ಕ್ ಮಾಡಲಾಗುವ ದ್ವಿಚಕ್ರ ವಾಹನಗಳು ಕಳವಾಗುತ್ತಿರುವ ಪ್ರಕರಣಗಳು ಹೆಚ್ಚಾಗಿದೆ. ಈ ಕುರಿತು ನಗರ ಠಾಣೆಯಲ್ಲಿ ಇಂದು 2 ಪ್ರಕರಣಗಳು ದಾಖಲಾಗಿದೆ.
ನಿನ್ನೆ ಬನ್ನಂಜೆಯ ಎಸ್‍ಬಿಐ ಎಟಿಎಂ ಎದುರು ನಿಲ್ಲಿಸಿದ್ದ ರಾಜೇಶ್‍ರಾವ್ ಎಂಬವರ ಸ್ಕೂಟರ್ ಕಳವಾಗಿದೆ. ರಾಜೇಶ್ ರಾವ್ ಅವರು ಎಟಿಎಂ ಎದುರು ಬೈಕ್ ನಿಲ್ಲಿಸಿ ಕೀ ಅದರಲ್ಲಿಯೇ ಇಟ್ಟು ಎಟಿಎಂ ಒಳಗೆ ಹೋಗಿದ್ದರು. ಆದರೆ ಅವರು ಎಟಿಎಂ ಒಳಗೆ ಹೋಗಿ ಬರುವುದರೊಳಗೆ ನಿಲ್ಲಿಸಿದ್ದ ಸ್ಕೂಟರ್ ಕಳವಾಗಿದೆ.
ಮತ್ತೊಂದೆಡೆ ನಗರದ ಕೆ.ಎಸ್.ಆರ್.ಟಿ.ಸಿ ಬಸ್ ನಿಲ್ದಾಣದ ಬಳಿ ನಿಲ್ಲಿಸಲಾಗಿದ್ದ ಯಾದಗಿರಿ ಮೂಲದ ಹುಣಸಗಿ ತಾಲೂಕಿನ ಕೊಳಿಹಾಳ ಗ್ರಾಮದ ಪರಶುರಾಮ್ ಸಾಲಿಯಾರ್ ಎಂಬವರ ಬೈಕ್ ಕಳವಾಗಿದೆ. ಪರಶುರಾಮ್ ಸಾಲಿಯಾರ್ ಅವರ ಮಾಲಿಕತ್ವದ ಬೈಕ್ ನಲ್ಲಿ ಅವರ ಬಾವ ಶಂಕ್ರಪ್ಪ ಇಸಾಂಪುರ ರವರು ಎ.20 ರಂದು ಬೆಳಿಗ್ಗೆ ಕೆಲಸದ ನಿಮಿತ್ತ ಉಡುಪಿಗೆ ಬಂದಿದ್ದು, ನಗರದ ಕೆ.ಎಸ್.ಆರ್.ಟಿ.ಸಿ ಬಸ್ ನಿಲ್ದಾಣದ ಬಳಿ ಬೈಕ್ ನಿಲ್ಲಿಸಿ ತಮ್ಮ ಕೆಲಸಕ್ಕೆ ಹೋಗಿದ್ದರು. ಬಳಿಕ ಬಂದು ನೋಡುವಾಗ ಬೈಕ್ ಕಳವಾಗಿರುವುದು ತಿಳಿದು ಬಂದಿದೆ. ಈ ಎರಡೂ ಪ್ರಕರಣಕ್ಕೆ ಸಂಬಂಧಿಸಿ ಉಡುಪಿ ನಗರ ಪೊಲೀಸ್ ಠಾಣೆಯಲ್ಲಿ ಎರಡು ಪ್ರತ್ಯೇಕ ಪ್ರಕರಣ ದಾಖಲಾಗಿದೆ.
