ಅಂಗಡಿ ಜಗಲಿಯಲ್ಲಿದ್ದವರ ಮೇಲೆ ಕಾರು ಹರಿದು ಓರ್ವ ಮೃತ್ಯು, ಇಬ್ಬರು ಗಂಭೀರ

ಕಾಸರಗೋಡು, ಮಾ.24: ಅಂಗಡಿ ಜಗಲಿಯಲ್ಲಿದ್ದವರ ಮೇಲೆ ನಿಯಂತ್ರಣ ತಪ್ಪಿದ ಕಾರೊಂದು ಹರಿದು ಓರ್ವ ಮೃತ ಪಟ್ಟು, ಇಬ್ಬರು ಗಂಭೀರ ಗಾಯಗೊಂಡ ಘಟನೆ ಇಂದು ಮುಂಜಾನೆ ಬೇಕಲದ ಕೋಟಿಕುಳ ಎಂಬಲ್ಲಿ ನಡೆದಿದೆ.

ವಿಷ್ಣು ಪ್ರಸಾದ್(20) ಎಂದು ಮೃತಪಟ್ಟವರು. ಜೊತೆಗಿದ್ದ ನಿತಿನ್ ಮತ್ತು ಶ್ರೀಲಾಲ್ ಎಂಬವರು ಗಂಭೀರ ಗಾಯ ಗೊಂಡಿದ್ದಾರೆ. ಗಾಯಗೊಂಡವರ ಪೈಕಿ ಶ್ರೀ ಲಾಲ್ ರನ್ನು ಮಂಗಳೂರು ಹಾಗೂ ನಿತಿನ್ ರನ್ನು ಕಾಸರಗೋಡು ಆಸ್ಪತ್ರೆಗೆ ದಾಖಲಿಸಲಾಗಿದೆ. ವಿಷ್ಣುಪ್ರಸಾದ್ ಸೇರಿದಂತೆ ಮೂವರು ಯುವಕರು ಸಮೀಪದ ತರವಾಡಿನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಪಾಲ್ಗೊಂಡು ಅಂಗಡಿ ವರಾಂಡದಲ್ಲಿ ವಿಶ್ರಮಿಸುತ್ತಿದ್ದರು. ಈ ಸಂದರ್ಭದಲ್ಲಿ ಅತೀ ವೇಗದಿಂದ ಬಂದ ಕಾರೊಂದು ಚಾಲಕನ ನಿಯಂತ್ರಣ ತಪ್ಪಿ ಅಂಗಡಿ ವರಾಂಡಕ್ಕೆ ನುಗ್ಗಿ ಅಲ್ಲೇ ವಿಶ್ರಮಿಸುತ್ತಿದ್ದ ವರ ಮೇಲೆ ಹರಿದಿದೆ. ಪರಿಣಾಮ ವಿಷ್ಣುಪ್ರಸಾದ್ ಅವರು ಮೃತಪಟ್ಟಿದ್ದು, ಮತ್ತಿಬ್ಬರು ಗಾಯಗೊಂಡಿದ್ದಾರೆ. ಈ ಬಗ್ಗೆ ಬೇಕಲ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.