ಉಡುಪಿ: ಸಂಪರ್ಕ್ ಜೆರೆಕ್ಸ್ ಅಗ್ನಿ ಅವಘಡ, ಲಕ್ಷಾಂತರ ಮೌಲ್ಯದ ವಸ್ತು ಭಸ್ಮ

ಉಡುಪಿ: ನಗರದ ಮೀನು ಮಾರುಕಟ್ಟೆ ಬಳಿಯ ಸಂಪರ್ಕ ಜೆರೆಕ್ಸ್ ಅಂಗಡಿಯ ಬೆಂಕಿ ಅವಘಡದಿಂದ ಲಕ್ಷಾಂತರ ಮೌಲ್ಯದ ಕಂಪ್ಯೂಟರ್, ಜೆರೆಕ್ಸ್ ಯಂತ್ರ, ಸಹಿತ ಹಲವಾರು ದಾಖಲೆ ಪತ್ರಗಳು ಸಂಪೂರ್ಣ ಭಸ್ಮವಾಗಿದೆ.

ಶನಿವಾರ ಸಂಜೆ 6.30ಕ್ಕೆ ಅಂಗಡಿಯನ್ನು ಸಿಬ್ಬಂದಿಗಳು ಬಂದ್ ಮಾಡಿ ಹೋದ ಸಂದರ್ಭ ಎಸಿಯಲ್ಲಿ ಉಂಟಾದ ಸಾರ್ಟ್ ಸಕ್ಯೂಟ್ ನಿಂದ ಬೆಂಕಿ ಕಾಣಿಸಿಕೊಂಡಿದೆ. ಈ ಬೆಂಕಿ ಅಂಗಡಿಯ ಎಲ್ಲಾ ಭಾಗಕ್ಕೂ ಆವರಿಸಿ ಅಂಗಡಿ ಒಳಗಿದ್ದ 10 ಕ್ಕೂ ಹೆಚ್ಚೂ ಕಂಪ್ಯೂಟರ್, ಜೆರೆಕ್ಸ್ ಯಂತ್ರ, ಸ್ಟೇಷನರಿ ವಸ್ತುಗಳ ಸಹಿತ ಕಾಲೇಜ್ ವಿದ್ಯಾರ್ಥಿಗಳು ನೀಡಿದ್ದ ಅನೇಕ ದಾಖಲೆ ಪತ್ರಗಳು ಸಂಪೂರ್ಣ ಸುಟ್ಟು ಕರಕಲಾಗಿದೆಂದು ಪೊಲೀಸರು ತಿಳಿಸಿದ್ದಾರೆ.

ಅಗ್ನಿ ನಂದಿಸಲು ನಾಲ್ಕು ಅಗ್ನಿಶಾಮಕ ವಾಹನ, ನಗರ ಪೊಲೀಸರು 2.30 ತಾಸು ಹರಸಾಹಸ ಪಟ್ಟರು. ಈ ಅವಘಡದಿಂದ ಲಕ್ಷಾಂತರ ಮೌಲ್ಯದ ವಸ್ತು ಹಾನಿಯಾಗಿರುವ ಬಗ್ಗೆ ಮಾಲಕ ಶ್ರೀನಿವಾಸ್ ಶೇಟ್ ನಗರ ಠಾಣೆಗೆ ಮಾಹಿತಿ ನೀಡುತ್ತಿದ್ದಾರೆ.