ಶಿರ್ವ: ಯುವ ಚಾರ್ಟೆಟೆಡ್ ಅಕೌಂಟೆಂಟ್ ಶೈನಿ ಮೆನೇಜಸ್ ಇನ್ನಿಲ್ಲ

ಶಿರ್ವ, ಜ.2 (ಉಡುಪಿ ಟೈಮ್ಸ್ ವರದಿ): ಯುವ ಚಾರ್ಟೆಟೆಡ್ ಅಕೌಂಟೆಂಟ್ ಶಿರ್ವ ಪಂಜಿಮಾರ್ ನಿವಾಸಿ ಶೈನಿ ಮಿನೇಜಸ್ (30) ಕಳೆದ‌ ಕೆಲವು ದಿನಗಳಿಂದ ಅಸೌಖ್ಯದಿಂದ ಇದ್ದು, ಮಣಿಪಾಲ ಆಸ್ಪತ್ರೆಯಲ್ಲಿ ಶನಿವಾರ ರಾತ್ರಿ ಚಿಕಿತ್ಸೆ ಫಲಕಾರಿಯಾಗದೆ ಮೃತ ಪಟ್ಟಿದ್ದಾರೆ.

ಕ್ಯಾನ್ಸರ್ ಗೆ‌ ತುತ್ತಾಗಿದ್ದ ಶೈನಿ ಮಿನೇಜಸ್ ಕಳೆದ ತಿಂಗಳು ಡಿ‌.20 ರಂದು ಮಣಿಪಾಲ ಆಸ್ಪತ್ರೆಯ ತೀವ್ರ ನಿಗಾ‌ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ‌ ಚಿಕಿತ್ಸೆಗೆ‌ ಸ್ಪಂದಿಸದ ಅವರು ಮೃತರಾಗಿದ್ದಾರೆಂದು ಕುಟುಂಬ ವರ್ಗದವರು‌ ತಿಳಿಸಿದ್ದಾರೆ.

ಪ್ರತಿಭಾವಂತರಾಗಿದ್ದ ಶೈನಿಯವರು 2016 ರಲ್ಲಿ ಸಿಎ ಪರೀಕ್ಷೆಯಲ್ಲಿ ಉನ್ನತ ರ್ಯಾಂಕ್ ಪಡೆದು ಉತ್ತೀರ್ಣರಾಗಿ ಬೆಂಗಳೂರಿನ ಇವೈ ಸಂಸ್ಥೆಯಲ್ಲಿ ಉದ್ಯೋಗಿಯಾಗಿದ್ದರು.

ಮೃತರು ತಂದೆ,‌ ತಾಯಿ ಒರ್ವ ಸಹೋದರಿ ಸಹಿತ ಅಪಾರ ಬಂಧು ಬಳಗವನ್ನು ಅಗಲಿದ್ದಾರೆ.

ಶೈನಿ ಮಿನೇಜಸ್ ಪಾಂಬೂರು ದೇವಾಲಯದ ಗಾಯನ ಮಂಡಳಿಯಲ್ಲಿ ಮತ್ತು ಪಾಂಬೂರು ಐಸಿವೈಎಂ ಯುವ ಸಂಘಟನೆಯಲ್ಲಿ ಸೇವೆ ಸಲ್ಲಿಸಿದ್ದರು. ತನ್ನ ನಾಯಕತ್ವದ ಗುಣಗಳಿಂದ ಸರ್ವರ ಮನ ಗೆದ್ದಿದ್ದ ಇವರು ಶಿರ್ವ ವಲಯದ ಐಸಿವೈಎಂ ಕಾರ್ಯದರ್ಶಿಯಾಗಿ ಸೇವೆ ಸಲ್ಲಿಸಿದ್ದರು.