ನಗರ ಭಾಗವತರ ಕುಟುಂಬಕ್ಕೆ ಅಭಿಮಾನಿಗಳಿಂದ ಧನ ಸಹಾಯ ವಿತರಣೆ
ಉಡುಪಿ: ಬಡಗುತಿಟ್ಟು ಯಕ್ಷಗಾನದ ಹೆಸರಾಂತ ಭಾಗವತ ಹಾಗೂ ಉದಯೋನ್ಮುಖ ಕಲಾವಿದ ನಗರ ಸುಬ್ರಹ್ಮಣ್ಯ ಆಚಾರ್ಯರವರು ಅಕಾಲಿಕ ಮರಣವನ್ನಪ್ಪಿದ ಹಿನ್ನೆಲೆಯಲ್ಲಿ ಅವರ ಅಭಿಮಾನಿಗಳು ಭಾಗವತ ದಿ. ನಗರ ಸುಬ್ರಹ್ಮಣ್ಯ ಆಚಾರ್ ಅಭಿಮಾನಿಗಳ ಬಳಗವನ್ನು ಹುಟ್ಟು ಹಾಕಿ ದಿವಂಗತರ ಕುಟುಂಬಕ್ಕೆ ಧನ ಸಹಾಯ ಮಾಡುವ ಸಂಕಲ್ಪವನ್ನು ಮಾಡಿದರು.
ಅದರಂತೆ ದಿವಂಗತರ ಅಭಿಮಾನಿಗಳು ದಾನ ನೀಡಿದ ಒಟ್ಟು ರೂ. 1,11,000 ನಗದು ಹಣವನ್ನು ಭಾಗವತರ ಪತ್ನಿ ಸರಸ್ವತಿ ಆಚಾರ್ ರವರಿಗೆ ಉಡುಪಿಯಲ್ಲಿರುವ ಬಳಗದ ಅಧ್ಯಕ್ಷರ ಕಚೇರಿಯಲ್ಲಿ ನಡೆದ ಸರಳ ಸಮಾರಂಭದಲ್ಲಿ ಹಸ್ತಾಂತರಿಸಲಾಯಿತು.
ಈ ಸಂದರ್ಭದಲ್ಲಿ ಅಭಿಮಾನಿಗಳ ಬಳಗದ ಅಧ್ಯಕ್ಷರಾದ ಆತ್ರಾಡಿ ಪೃಥ್ವಿರಾಜ ಹೆಗ್ಡೆ, ಪ್ರ.ಕಾರ್ಯದರ್ಶಿ, ಯಕ್ಷಗಾನ ಕಲಾವಿದ ದಿನಕರ ಮರಕಾಲ ನಡೂರು, ನಿವೃತ್ತ ಶಿಕ್ಷಕ ವಾಸು ಆಚಾರ್ ಪರ್ಕಳ ಹಾಗೂ ಥೋಮಸ್ ಸುವಾರಿಸ್ ಉಪ್ಪೂರು ಹಾಜರಿದ್ದರು.
ಸಹಾಯ ಧನ ಸ್ವೀಕರಿಸಿ ಸಾಂದರ್ಭಿಕವಾಗಿ ಮಾತನಾಡಿದ ಸರಸ್ವತಿ ಅಚಾರ್ಯರವರು ಕೊರೋನಾ ಮಹಾಮಾರಿ ಕಾಯಿಲೆ ಯಿಂದಾಗಿ ಇಡೀ ದೇಶವೇ ಸಂಕಷ್ಟದಲ್ಲಿರುವಾಗ ತನ್ನ ಕೀರ್ತಿಶೆಷ ಪತಿಯ ಅಭಿಮಾನಿಗಳ ಬಳಗದ ಸದಸ್ಯರುಗಳು ನಿರೀಕ್ಷೆಗೂ ಮೀರಿದ ಮೊತ್ತವನ್ನು ಕಲೆಹಾಕುವಲ್ಲಿ ತೋರಿದ ಬದ್ಧತೆಯನ್ನು ಶ್ಲಾಘಿಸಿದರು. ತನ್ನ ಕುಟುಂಬ ಆರ್ಥಿಕವಾಗಿ ದುಸ್ಥಿತಿದಲ್ಲಿರುವಾಗ ಮಾನವೀಯತೆಯಿಂದ ಧನ ಸಹಾಯ ನೀಡಿ ಸಹಕರಿಸಿದ್ದಕ್ಕೆ ಅಭಿಮಾನಿಗಳ ಬಳಗದ ಎಲ್ಲಾ ಪದಾಧಿಕಾರಿಗಳನ್ನು ಮತ್ತು ಸದಸ್ಯರುಗಳನ್ನೂ ಕೊಂಡಾಡಿದ ಅವರು ಎಲ್ಲರಿಗೂ ಕೃತಜ್ಞತೆಯನ್ನು ಸಲ್ಲಿಸಿದರು.
ಭಾಗವತರ ಕುಟುಂಬಕ್ಕೆ ಧನ ಸಹಾಯ ಮಾಡಲಿಚ್ಚಿಸುವ ಅಭಿಮಾನಿಗಳು ಭಾಗವತರ ಧರ್ಮಪತ್ನಿ ಸರಸ್ವತಿ ಆಚಾರ್ಯರು ಯೂನಿಯನ್ ಬ್ಯಾಂಕ್ ಆಪ್ ಇಂಡಿಯಾದ ಹೋಲಿ ರೋಸರಿ ಚರ್ಚ್ ಕಂಪೌಂಡ್ ಸಂತೆಕಟ್ಟೆ ಶಾಖೆ ಯಲ್ಲಿ ಹೊಂದಿರುವ ಉಳಿತಾಯ ಖಾತೆ ನಂಬ್ರ: 520101021819838 IFSC-UBINO 907332 ಕ್ಕೆ ಜಮೆ ಮಾಡಬಹುದಾಗಿರುತ್ತದೆಂದು ಅಭಿಮಾನಿಗಳ ಬಳಗದ ಅಧ್ಯಕ್ಷರು ತಿಳಿಸಿರುತ್ತಾರೆ.
