20 ವರ್ಷಗಳ ಬಳಿಕ ಟಾಪ್ 5 ರಲ್ಲಿ ಕಾಣಿಸಿಕೊಂಡ ಭಾರತದ ಪ್ರತಿಭೆ ಅ್ಯಡ್ಲಿನ್ ಕ್ಯಾಸ್ತಲಿನೊ

ಉಡುಪಿ (ಉಡುಪಿ ಟೈಮ್ಸ್ ವರದಿ): ಭುವನ ಸುಂದರಿ ಸ್ಪರ್ಧೆ ಯೋಚಿಸಿದಷ್ಟು ಸುಲಭವಲ್ಲ. ಅದರಲ್ಲೂ ವಿಶ್ವದ ಪ್ರಮುಖ ರಾಷ್ಟ್ರಗಳ ಸುಂದರಿಯರ ಜೊತೆಗೆ ಸ್ಪರ್ಧೆ ಮಾಡುವುದು ಮುಳ್ಳಿನ ದಾರಿಯೇ ಸರಿ. ವಿಶ್ವ ಭುವನ ಸುಂದರಿ ಸ್ಪರ್ಧೆ ಕೇವಲ ಸೌಂದರ್ಯಕ್ಕೆ ನಡೆಯುತ್ತದೆ ಎಂಬುದು ನಿಮ್ಮ ಊಹೆಯಾದರೆ ಅದು ತಪ್ಪು. ಸೌಂದರ್ಯದ ಜೊತೆಗೆ ತೀರ್ಪುದಾರರು ಕೇಳುವ ಪ್ರಶ್ನೆಗಳಿಗೆ ಸ್ಪರ್ಧಿಗಳು ಕ್ಷಣಮಾತ್ರದಲ್ಲಿ ಚಾಣಾಕ್ಷ್ಯದಿಂದ ಉತ್ತರಿಸಬೇಕು. ಇಂತಹ ಕಠಿಣ ಸವಾಲುಗಳನ್ನು ಮೆಟ್ಟಿ, ವಿಶ್ವದ 74 ರಾಷ್ಟ್ರದ ಸ್ಪರ್ಧಿಗಳ ಮುಂದೆ, ಮೂರನೇ ರನ್ನರ್ ಅಪ್ ಆಗಿ, ಭಾರತದ ಕೀರ್ತಿ ಪತಾಕೆಯನ್ನು ಹಾರಿಸಿದ ಮಿಸ್ ಅ್ಯಡ್ಲಿನ್ ಕ್ಯಾಸ್ತಲೀನೋ ಉಡುಪಿ ಜಿಲ್ಲೆಯವರೆಂಬುದು ಹೆಗ್ಗಳಿಕೆಯ ವಿಷಯ.

2001ರಲ್ಲಿ ಭಾರತದ ಸೆಲೀನಾ ಜೇಟ್ಲಿ ಭುವನ ಸುಂದರಿ ಸ್ಪರ್ಧೆಯಲ್ಲಿ ಟಾಪ್ 5 ತಲುಪಿದ್ದು ಕೊನೆಯ ಬಾರಿ. ಇಪ್ಪತ್ತು ವರ್ಷಗಳ ಬಳಿಕ ಮತ್ತೆ ಭಾರತದ ಕೀರ್ತಿ ಪತಾಕೆ ವಿಶ್ವದೆತ್ತರಕ್ಕೆ ತಲುಪಿದೆ. ಉಡುಪಿ ಜಿಲ್ಲೆಯ ಉದ್ಯಾವರದ ಸಂಪಿಗೆನಗರದ ನಿವಾಸಿ ಮೀರಾ ಮತ್ತು ಅಲ್ಫೋನ್ಸಸ್ ಕಸ್ತಲಿನೊ ದಂಪತಿಗಳ 3ಮಕ್ಕಳಲ್ಲಿ, ದ್ವಿತೀಯ ಮಗಳಾಗಿ 1998ರ ಜುಲೈ 21ರಂದು ಅ್ಯಡ್ಲಿನ್ ಅರಬ್ ರಾಷ್ಟ್ರ ಕುವೈತ್ ನಲ್ಲಿ ಜನನ ಪಡೆದರು. ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣವನ್ನು ಕುವೈಟ್ ನ ಇಂಡಿಯನ್ ಸೆಂಟ್ರಲ್ ಸ್ಕೂಲ್ ನಲ್ಲಿ ಪಡೆದರು. ಎಸ್ಸೆಸ್ಸೆಲ್ಸಿಯಲ್ಲಿ 95% ಅಂಕ ಪಡೆದ ಕೀರ್ತಿ ಅ್ಯಡ್ಲಿನ್ ರವರದ್ದು.

ಬಳಿಕ ಮುಂಬೈನ ನಲ್ಲಿ ಉನ್ನತ ಶಿಕ್ಷಣವನ್ನು ಸಂತ ಝೇವಿಯರ್ ಕಾಲೇಜ್ ಮತ್ತು ವಿಲ್ಸನ್ ಕಾಲೇಜ್  ನಡೆಸಿದರು.  ಪ್ರಾಥಮಿಕ ವಿದ್ಯಾಭ್ಯಾಸದ ವೇಳೆಯೇ ಕೊರಿಯೋಗ್ರಾಫರ್ ನತ್ತ ವಿಶೇಷ ಆಕರ್ಷಿತಳಾಗಿದ್ದ ಅ್ಯಡ್ಲಿನ್, ವಿವಿಧ ಸೌಂದರ್ಯ ಸ್ಪರ್ಧೆಯಲ್ಲಿ ಭಾಗವಹಿಸಿ, ಪ್ರಶಸ್ತಿ ಬಾಚಿದ್ದಳು. 2020 ರಲ್ಲಿ ಮುಂಬಯಿಯಲ್ಲಿ ನಡೆದ ಮಿಸ್ ದಿವಾ ಯುನಿವರ್ಸ್ ಸ್ಪರ್ಧೆಯಲ್ಲಿ ಪ್ರಥಮ ಸ್ಥಾನಿಯಾಗಿದ್ದ ಅ್ಯಡ್ಲಿನ್  ದೇಶದ ಪ್ರತಿನಿಧಿಯಾಗಿ ಅಂತಾರಾಷ್ಟ್ರೀಯ ಸ್ಪರ್ಧೆಯಲ್ಲಿ ಭಾಗವಹಿಸುವ ಅವಕಾಶ ಪಡೆದಿದ್ದರು. ಕೊರೊನಾ ಕಾರಣದಿಂದ ಕಳೆದ ವರ್ಷ ನಡೆಯಬೇಕಾಗಿದ್ದ ಈ ಸ್ಪರ್ಧೆ ಒಂದು ವರ್ಷ ತಡವಾಗಿ ನಡೆದರೂ, ದೇಶದ ಕೀರ್ತಿ ಪತಾಕೆಯನ್ನು ವಿಶ್ವದೆತ್ತರಕ್ಕೆ ತಲುಪಿಸುವಲ್ಲಿ ಆ್ಯಡ್ಲಿನ್ ಯಶಸ್ವಿಯಾಗಿದ್ದಾಳೆ.

ಕೃಷಿ ಕುಟುಂಬದ ಹಿನ್ನೆಲೆಯಲ್ಲಿದ್ದ ಅ್ಯಡ್ಲಿನ್, ಮಿಸ್ ದಿವಾ ಯುನಿವರ್ಸ್ ಸ್ಪರ್ಧೆಯಲ್ಲಿ ರೈತರ ಬಗ್ಗೆ ವಿಶೇಷ ಮಾತುಗಳನ್ನು ಆಡಿ ತೀರ್ಪುಗಾರರ ಮನಗೆದ್ದಿದ್ದಳು. ‘ಮಿಸ್ ದಿವಾ ಯುನಿವರ್ಸ್ 2020’ ಸ್ಪರ್ಧೆಯ ವಿಜೇತೆಯಾಗಿ ಕಳೆದ ಬಾರಿ ಹುಟ್ಟೂರಿಗೆ ಆಗಮಿಸಿದ್ದಾಗ, ಉದ್ಯಾವರ ಸಂತ ಫ್ರಾನ್ಸಿಸ್ ಝೇವಿಯರ್ ದೇವಾಲಯದ ವತಿಯಿಂದ, ಐಸಿವೈಎಂ ಉದ್ಯಾವರ ಸುವರ್ಣ ಮಹೋತ್ಸವ ಸಮಿತಿಯ ವಿಶೇಷ ಮುತುವರ್ಜಿಯಲ್ಲಿ, ಕಥೋಲಿಕ್ ಸಭಾ ಮತ್ತು ಸ್ತ್ರೀ ಸಂಘಟನೆಯ ಸಹಕಾರದೊಂದಿಗೆ ಉದ್ಯಾವರದಲ್ಲಿ ತೆರೆದ ವಾಹನದ ಮೂಲಕ ಭವ್ಯ ಮೆರವಣಿಗೆಯೊಂದಿಗೆ ಹುಟ್ಟೂರ ಸನ್ಮಾನ ಅದ್ದೂರಿಯಾಗಿ ನಡೆಸಲಾಗಿತ್ತು.

ಉಡುಪಿ ಧರ್ಮಪ್ರಾಂತ್ಯದ ಕುಲಪತಿ ಅ. ವಂ. ಫಾ. ಸ್ಟ್ಯಾನಿ ಬಿ ಲೋಬೊ, ಕಾಪು ಶಾಸಕ ಲಾಲಾಜಿ ಆರ್ ಮೆಂಡನ್, ಮಾಜಿ ಸಚಿವರಾದ ಪ್ರಮೋದ್ ಮಧ್ವರಾಜ್, ವಿನಯಕುಮಾರ್ ಸೊರಕೆ, ಗ್ರಾಮಪಂಚಾಯತ್ ಅಂದಿನ ಅಧ್ಯಕ್ಷೆ ಸುಗಂಧಿ ಶೇಖರ್, ಉದ್ಯಮಿ ಹಾಜಿ ಅಬ್ದುಲ್ ಜಲೀಲ್ ಸಾಹೇಬ್, ಉದ್ಯಮಿ ಲಿಯೋ ಡಿಸೋಜ  ಸಹಿತ ಜನಪ್ರತಿನಿಧಿಗಳು ಮತ್ತು ವಿವಿಧ ಸಂಘಟನೆಯ ಮುಖಂಡರು ಸಮಾರಂಭದಲ್ಲಿ ಭಾಗವಹಿಸಿ ಶುಭಹಾರೈಸಿದ್ದರು.

2 ದಿನಗಳ ಹಿಂದೆಯಷ್ಟೇ ಅಮೆರಿಕದ ಫ್ಲೋರಿಡಾದಲ್ಲಿ ನಡೆದ ಭುವನ ಸುಂದರಿ ಸ್ಪರ್ಧೆಯಲ್ಲಿ ಮೂರನೇ ರನ್ನರ್ ಅಪ್ ಸ್ಥಾನ ಪಡೆದಿರುವ ಆ್ಯಡ್ಲಿನ್ ಕಸ್ಟಲಿನೊ ಇಂದು ಮುಂಬೈಗೆ ತಲುಪಲಿದ್ದಾರೆ. ಇವರ ಹಿರಿಯ ಸಹೋದರಿ ಅನಿಸ್ಸಿಯಾ ಮತ್ತು ಕಿರಿಯ ಸಹೋದರಿ ಆ್ಯಂಡ್ರಿಯಾ ಉದ್ಯಾವರ ಕೊರಂಗ್ರಪಾಡಿಯ ನಿವಾಸದಲ್ಲಿ ವಾಸವಿದ್ದು, ಉನ್ನತ ಶಿಕ್ಷಣವನ್ನು ಪಡೆಯುತ್ತಿದ್ದಾರೆ.
ಐಸಿವೈಎಂ ಉದ್ಯಾವರ ಸುವರ್ಣ ಮಹೋತ್ಸವ ಸಮಿತಿಯ ಅಧ್ಯಕ್ಷ ಮೈಕಲ್ ಡಿಸೋಜ, ಅ್ಯಡ್ಲಿನ್ ರವರ ಸಾಧನೆಯ ಬಗ್ಗೆ ಮೆಚ್ಚುಗೆ ಮಾತುಗಳನ್ನಾಡಿದ್ದಾರೆ. ‘ಮಿಸ್ ದಿವಾ ಯುನಿವರ್ಸ್ ಸ್ಪರ್ಧೆಯಲ್ಲಿ ಅ್ಯಡ್ಲಿನ್ ಪ್ರಥಮ ಸ್ಥಾನ ಪಡೆದಾಗಲೇ ನಾವು ಹೆಮ್ಮೆಪಟ್ಟು ಕೊಂಡಿದ್ದೆವು.

ಅಂದು ನಾವು ಹುಟ್ಟೂರ ಸನ್ಮಾನ ನಡೆಸಿದ್ದು ಇಂದು ಸಾರ್ಥಕವಾಗಿದೆ. ಅವರ ಸಾಧನೆಯಿಂದ ಅವರ ತಂದೆ ತಾಯಿ ಮತ್ತು ನಾವೆಲ್ಲರೂ ಹೆಮ್ಮೆ ಪಡುವಂತಾಗಿದೆ. ದೇಶದ ಜೊತೆಗೆ ನಮ್ಮೂರಿನ ಕೀರ್ತಿ ಪತಾಕೆಯು ವಿಶ್ವದೆತ್ತರಕ್ಕೆ ತಲುಪಿದೆ’ ಎಂದಿದ್ದಾರೆ.

ಸ್ಟೀವನ್ ಕುಲಾಸೋ ಉದ್ಯಾವರ