ಅಂಬಲಪಾಡಿ ಹೆದ್ದಾರಿ ಬಳಕೆದಾರರ ವೇದಿಕೆಯೇ ಅನಧಿಕೃತ! – ಸ್ಥಾಪಿತ ಹಿತಾಸಕ್ತಿಗಳಿಂದ ಪ್ರಾಯೋಜಿತ ಸ್ವಹಿತಾಸಕ್ತಿ ವೇದಿಕೆ !

ರಾ.ಹೆ.66 ಅಂಬಲಪಾಡಿ ಬಳಕೆದಾರರ ಹಿತರಕ್ಷಣಾ ವೇದಿಕೆಯ ಕಾರ್ಯಕಾರಿ ಸಮಿತಿ ಹೇಳಿಕೆ

ಉಡುಪಿ ಡಿ.20: ರಾಷ್ಟ್ರೀಯ ಹೆದ್ದಾರಿ 66ರ ಅಂಬಲಪಾಡಿ ಜಂಕ್ಷನ್‌ನಲ್ಲಿ ಮೇಲ್ಸೇತುವೆ ಕಾಮಗಾರಿ ನಡೆಯುತ್ತಿರುವ ಸ್ಥಳದಲ್ಲಿ ಅಂಬಲಪಾಡಿ ಪರಿಸರದವರೇ ಅಲ್ಲದ, ಎಂದೂ ಹೆದ್ದಾರಿ ಬಳಕೆದಾರರ ಬೇಡಿಕೆಗಾಗಿ ಹೋರಾಟ ನಡೆಸದೇ ಇರುವ ಹೊರಗಿನ ಸ್ವಹಿತಾಸಕ್ತಿಯ ಜನರನ್ನು ಬಾಡಿಗೆಗೆ ಎರವಲು ಪಡೆದು ಬೆರಳೆಣಿಕೆಯ ಸ್ಥಾಪಿತ ಹಿತಾಸಕ್ತಿದಾರರು ಹತಾಶರಾಗಿ ನಡೆಸಿದ 2ನೇ ಪ್ರಾಯೋಜಿತ ಪ್ರಯೋಗವೇ ಈ ಪ್ರತಿಭಟನೆ ಎಂದು ರಾ.ಹೆ.66ರ ಅಂಬಲಪಾಡಿ ಬಳಕೆದಾರರ ಹಿತರಕ್ಷಣಾ ವೇದಿಕೆ ಛೇಡಿಸಿದೆ.

ಡಿ.18ರಂದು ವೇದಿಕೆಯ ಸಂಚಾಲಕ ಭಾಸ್ಕರ್ ಶೆಟ್ಟಿ ಕಡೆಕಾರು ಅವರ ಅಧ್ಯಕ್ಷತೆಯಲ್ಲಿ ಸಹ ಸಂಚಾಲಕ ಅಲ್ತಾಫ್ ಅಹ್ಮದ್ ಅವರ ಮನೆಯ ಬಳಿ ನಡೆದ ರಾ.ಹೆ.66ರ ಅಂಬಲಪಾಡಿ ಬಳಕೆದಾರರ ಹಿತರಕ್ಷಣಾ ವೇದಿಕೆಯ ಕಾರ್ಯಕಾರಿ ಸಮಿತಿಯ ತುರ್ತು ಸಭೆಯಲ್ಲಿ ಸಮಿತಿಯು ಪ್ರತಿಭಟನಾಕಾರರ ನಡೆಯನ್ನು ತೀವ್ರವಾಗಿ ಖಂಡಿಸಿದೆ.

ಸ್ವಹಿತಾಸಕ್ತಿಯುಳ್ಳ ಪ್ರತಿಭಟನಕಾರರು ರಾಷ್ಟ್ರೀಯ ಹೆದ್ದಾರಿಯ ಸಂತೆಕಟ್ಟೆ, ಕರಾವಳಿ ಬೈಪಾಸ್ ಕಾಮಗಾರಿಯು ಅವೈಜ್ಞಾನಿಕವಾಗಿದೆ, ಹೆದ್ದಾರಿ ಇಲಾಖೆ ಮತ್ತು ಜಿಲ್ಲಾಡಳಿತ ಅಂಬಲಪಾಡಿಯಲ್ಲಿ ಕಾರ್ಯಗತವಾಗುತ್ತಿರುವ ಕಾಮಗಾರಿಯ ಮಾಹಿತಿ ಫಲಕ ಅಳವಡಿಸಲಿಲ್ಲ ಮತ್ತು ಅನುಷ್ಠಾನ ಮಾಡುವಾಗ ಸಾರ್ವಜನಿಕರಿಗೆ ಬದಲಿ ವಾಹನ ಸಂಚಾರದ ಮಾಹಿತಿ ನೀಡಿಲ್ಲ ಎಂದು ಆಪಾದಿಸಿದ್ದಾರೆ.

ಜಿಲ್ಲಾಡಳಿತ ಹೆದ್ದಾರಿ ಅಧಿಕಾರಿಗಳೊಂದಿಗೆ ಜನಪ್ರತಿನಿಧಿಗಳ ಉಪಸ್ಥಿತಿಯಲ್ಲಿ 3 ಬಾರಿ ಸತತವಾಗಿ ಸಭೆ ನಡೆಸಿದೆ ಹಾಗೂ ಮಾಧ್ಯಮಗಳ ಮೂಲಕ ಸೂಕ್ತ ಮಾಹಿತಿ ನೀಡಿದೆ.

ಪ್ರತಿಭಟನಾಕಾರರು ಕೇವಲ ಬೆರಳೆಣಿಕೆಯ ಉದ್ಯಮಿಗಳಿಗೋಸ್ಕರ ಎಲಿವೇಟೆಡ್ ಫೈ ಓವ‌ರ್ ನಿರ್ಮಾಣದ ಪ್ರಸ್ತಾವನೆಯ ಆಪಾದನೆಯನ್ನು ಅವರ ಮೇಲೆ ಮಾಡಲಾಗುತ್ತಿದೆ ಎಂಬ ವಿಚಾರವನ್ನು ಸ್ವಹಿತಾಸಕ್ತಿದಾರ ಪ್ರತಿಭಟನಾಕಾರರು ಸ್ವತಃ ಪರೋಕ್ಷವಾಗಿ ಒಪ್ಪಿಕೊಂಡಿದ್ದಾರೆ. ಯಾಕೆಂದರೆ ಕರಾವಳಿ ಬೈಪಾಸ್ ಮತ್ತು ಕಿನ್ನಿಮುಲ್ಕಿಯಲ್ಲಿ ಅಭಿವೃದ್ಧಿ ಕಾಮಗಾರಿ ಈಗಾಗಲೇ ನಡೆದಿದ್ದು, ಅಂಬಲಪಾಡಿ ಜಂಕ್ಷನ್‌ನಲ್ಲಿ ಅಗತ್ಯವಾಗಿ ಕಾಮಗಾರಿ ಅನುಷ್ಠಾನವಾಗಬೇಕಾಗಿರುವುದರಿಂದ ಈಗ ಎಲಿವೇಟೆಡ್ ಫೈಓವರ್ ಪ್ರಸ್ತಾವನೆಯನ್ನು ಮಾಡಿರುವುದು ತಾಂತ್ರಿಕವಾಗಿ, ಆಡಳಿತಾತ್ಮಕವಾಗಿ ಎಷ್ಟು ಪ್ರಸ್ತುತ ಎಂಬುದನ್ನು ಅವಲೋಕಿಸಬೇಕಾಗಿದೆ. ಈ ಬಗ್ಗೆ ಸ್ಥಾಪಿತ ಹಿತಾಸಕ್ತಿದಾರರು ಸ್ವಹಿತಾಸಕ್ತಿಯುಳ್ಳ ನಗರಸಭಾ ಸದಸ್ಯ ಮತ್ತು ಪ್ರತಿಭಟನಾಕಾರರಿಂದ ಹೇಳಿಕೆ ಕೊಡಿಸಿದಂತಿದೆ.

ರಾ.ಹೆ.66ರ ಅಂಬಲಪಾಡಿ ಬಳಕೆದಾರರ ಹಿತರಕ್ಷಣಾ ವೇದಿಕೆ ಯು ಕಳೆದ 8 ವರ್ಷಗಳಿಂದ ಸ್ಥಳೀಯವಾಗಿ ಶಾಶ್ವತ ಪರಿಹಾರ ಕಂಡುಕೊಳ್ಳಲು ಹೋರಾಟಗಳನ್ನು ನಡೆಸಿಕೊಂಡು ಬಂದಿದೆ. ಆದರೆ ಪ್ರತಿಭಟನಾಕಾರರು ಇದುವರೆಗೂ ಯಾಕೆ ತಮ್ಮ ಎಲಿವೇಟೆಡ್ ಫೈಓವರ್ ಪ್ರಸ್ತಾವನೆಯನ್ನು ಮಂಜೂರು ಮಾಡಿಸಿಕೊಂಡು ಬಂದಿಲ್ಲ. ರಾ.ಹೆ.66ರ ಅಂಬಲಪಾಡಿ ಜಂಕ್ಷನ್‌ನಲ್ಲಿ ಅನುಷ್ಠಾನವಾಗುತ್ತಿರುವ ಮೇಲ್ಲೇತುವೆ ಕಾಮಗಾರಿಯ ಟೆಂಡರ್ ಮಂಜೂರಾಗಿ ಸುಮಾರು ಒಂದು ವರ್ಷವಾಗಿದ್ದರೂ ಈ ಅವಧಿಯಲ್ಲಿ ಕೂಡಾ ಪ್ರಯತ್ನ ಮಾಡಬಹುದಿತ್ತು. ಆದರೆ ಪ್ರಸಕ್ತ ಮೇಲ್ಸೇತುವೆ ನಿರ್ಮಾಣ ಕಾಮಗಾರಿಯು ಪ್ರಗತಿಯ ಹಂತದಲ್ಲಿರುವಾಗ ಮಾಡುತ್ತಿರುವ ಇಂತಹ ಯಾವುದೇ ಪ್ರಸ್ತಾವನೆ ಹೆದ್ದಾರಿ ಬಳಕೆದಾರರ ಬಹು ವರ್ಷಗಳ ಬೇಡಿಕೆಯ ದಿಕ್ಕು ತಪ್ಪಿಸುವ ಹುನ್ನಾರವಾಗಿದೆ.

ಎಲಿವೇಟೆಡ್ ಫೈಓವರ್ ಪ್ರಸ್ತಾವನೆಯನ್ನು ಈ ಹಿಂದೆ ರಾಷ್ಟ್ರೀಯ ಹೆದ್ದಾರಿ 17 ರಿಂದ 66 ಆಗಿ ಅಪ್ ಗ್ರೇಡ್ ಆದಾಗ ಮಂಜೂರಾತಿ ಹಂತದಲ್ಲಿ ಇರುವಾಗ ತಪ್ಪಿಸಿ ಅಂಬಲಪಾಡಿಗೆ ಫೂಟ್ ಓವರ್ ಬ್ರಿಡ್ಜ್ ಪ್ರಸ್ತಾವನೆ ಮಾಡಿಸಿದ್ದು ಯಾರು ಎಂಬುದನ್ನು ಜನತೆಗೆ ಸ್ಪಷ್ಟಪಡಿಸುವುದು ಯಾರು? ಎಂದು ರಾ.ಹೆ.66ರ ಬಳಕೆದಾರರ ಹಿತರಕ್ಷಣಾ ವೇದಿಕೆ ಪ್ರತಿಭಟನಾಕಾರರನ್ನು ಪ್ರಶ್ನಿಸಿದೆ.

ನ್ಯಾಯ ಸಮ್ಮತವಾದ ನೈಜ ಬೇಡಿಕೆ ಈಡೇರಿಕೆಗಾಗಿ ಪ್ರತಿಭಟನೆ ಮಾಡುವ ಹಕ್ಕು ಎಲ್ಲರಿಗೂ ಇದೆ. ಆದರೆ ಮೀನುಗಾರರ ಕುಟುಂಬದವರ ಮತ್ತು ಮೀನು ಸಾಗಾಣಿಕೆಯ, ಪ್ರವಾಸೋದ್ಯಮದ ನೆಪವನ್ನು ಹೇಳಿ ಸ್ವಹಿತಾಸಕ್ತಿಯ ಪ್ರಸ್ತಾವನೆಯನ್ನು ಮಾಡುವುದು ಎಷ್ಟು ಸರಿ ಎಂಬುದನ್ನು ಪ್ರಜ್ಞಾವಂತ ನಾಗರಿಕರು ಸೂಕ್ಷ್ಮವಾಗಿ ಗಮನಿಸಿ ಕ್ರಮ ಕೈಗೊಳ್ಳುತ್ತಾರೆ ಎಂದು ಹಿತರಕ್ಷಣಾ ವೇದಿಕೆ ಎಚ್ಚರಿಸಿದೆ.

ಅಂಬಲಪಾಡಿ ಜಂಕ್ಷನ್‌ನಲ್ಲಿ ಈ ಹಿಂದೆ ಸಾರ್ವಜನಿಕರು ವಿನಾಕಾರಣ ಅಪಘಾತಕ್ಕೀಡಾಗಿ ಪ್ರಾಣ ಹಾನಿ, ವೈಯಕ್ತಿಕ ನಷ್ಟ ಅನುಭವಿಸಿದಾಗ ಇರದ ಸಮಾಜ ಸೇವೆಯ ಕಾಳಜಿ ಈಗ ದಿಡೀರ್ ಆಗಿ ಹೇಗೆ ಬಂತು ಎಂಬುದನ್ನು ಸ್ವಹಿತಾಸಕ್ತಿದಾರರು ಮತ್ತು ಸ್ಥಾಪಿತಹಿತಾಸಕ್ತಿಗಳು ಜನರಿಗೆ ತಿಳಿಸಲಿ. ಸಮಾಜ ಸೇವೆಯ ಸೋಗಿನಲ್ಲಿ ಎಲಿವೇಟೆಡ್ ಪ್ರೈಓವರ್‌ನ ಪ್ರಸ್ತಾವನೆ ಮತ್ತು ಪ್ರತಿಭಟನೆ ಜನರನ್ನು ವಂಚಿಸುವ ಸಂಚಾಗಿದೆ. ರಾ.ಹೆ.66ರ ಅಂಬಲಪಾಡಿ ಬಳಕೆದಾರರ ಹಿತರಕ್ಷಣಾ ವೇದಿಕೆಯು ಸಾರ್ವಜನಿಕರ ಬೇಡಿಕೆಯ ಬಗ್ಗೆ ಈಗ ಇರುವ ನಿಲುವನ್ನು ಸಮರ್ಥಿಸಿಕೊಳ್ಳಲು ಬದ್ಧವಾಗಿದೆ. ಸ್ವಹಿತಾಸಕ್ತಿಯುಳ್ಳವರಿಗೆ ಮೀನುಗಾರ ಕುಟುಂಬದ ಶೇಕಡಾ ಒಂದರಷ್ಟು ಬೆಂಬಲ ಕೂಡ ಇಲ್ಲದವರಿಗೆ ಅವರ ಸಮಸ್ಯೆ, ಮೀನು ಸಾಗಾಣಿಕೆ, ಪ್ರವಾಸೋದ್ಯಮ ಹಾಗೂ ಅವೈಜ್ಞಾನಿಕ ಮುಂತಾದ ವಿಚಾರದ ಬಗ್ಗೆ ಮಾತನಾಡುವ ಯಾವುದೇ ನೈತಿಕತೆ ಇಲ್ಲ ಎಂದು ಹಿತರಕ್ಷಣಾ ವೇದಿಕೆ ಆಪಾದಿಸಿದೆ. ಇವರ ಪ್ರಸ್ತಾವನೆ, ಸಮಾಜ ಸೇವೆ ಕಾಳಜಿ ಎಲ್ಲವೂ ಅಪ್ರಸ್ತುತವಾಗಿದ್ದು ಜನರು ಅದನ್ನು ತಿರಸ್ಕರಿಸಿದ್ದಾರೆ. ಇದನ್ನು ಜಿಲ್ಲಾಡಳಿತ ಮತ್ತು ಸರಕಾರ ಕೂಡಾ ತಿರಸ್ಕರಿಸುತ್ತದೆ ಎಂದು ಹಿತರಕ್ಷಣಾ ವೇದಿಕೆಯು ಅಬಿಪ್ರಾಯಪಟ್ಟಿದೆ. ಇವರ ಪ್ರಸ್ತಾವನೆಯನ್ನು ತಿರಸ್ಕರಿಸಲು ಹೆದ್ದಾರಿ ಸಚಿವರಿಗೆ ಹಾಗೂ ಸಂಸದರಿಗೆ ಪತ್ರ ಬರೆದು ಮನವರಿಕೆ ಮಾಡಲಾಗುವುದು ಎಂದು ರಾ.ಹೆ.66ರ ಅಂಬಲಪಾಡಿ ಬಳಕೆದಾರರ ಹಿತರಕ್ಷಣಾ ವೇದಿಕೆ ಪತ್ರಿಕಾ ಹೇಳಿಕೆಯಲ್ಲಿ ತಿಳಿಸಿದೆ.

ಈ ಸಂದರ್ಭದಲ್ಲಿ ವೇದಿಕೆಯ ಸಹ ಸಂಚಾಲಕ ಅಲ್ತಾಫ್ ಅಹ್ಮದ್, ಕೋಶಾಧಿಕಾರಿ ಎ.ಮನೋಹರ್ ಶೆಟ್ಟಿ, ಸ್ಥಳೀಯ ಪ್ರಮುಖರಾದ ಬಿಜೆಪಿ ಜಿಲ್ಲಾ ಕಾರ್ಯಾಲಯ ಕಾರ್ಯದರ್ಶಿ ಶಿವಕುಮಾ‌ರ್ ಅಂಬಲಪಾಡಿ, ಉಡುಪಿ ನಗರಸಭಾ ಸದಸ್ಯ ಹರೀಶ್ ಶೆಟ್ಟಿ, ಜಿಲ್ಲಾ ಕಾಂಗ್ರೆಸ್ ಕಾರ್ಯದರ್ಶಿ ಕೀರ್ತಿ ಶೆಟ್ಟಿ, ಅಂಬಲಪಾಡಿ ಗ್ರಾಮ ಪಂಚಾಯತ್ ಮಾಜಿ ಅಧ್ಯಕ್ಷ ಯೋಗೀಶ್ ಶೆಟ್ಟಿ, ಮಾಜಿ ಉಪಾಧ್ಯಕ್ಷ ಆನಂದ ಬಂಗೇರ ಕಿದಿಯೂರು, ಶ್ರೀಕಾಂತ್ ಶೆಟ್ಟಿ ಅಂಬಲಪಾಡಿ, ಯಕ್ಷಗಾನ ಕಲಾವಿದ ಅಜಿತ್ ಶೆಟ್ಟಿಗಾರ್, ರಮೇಶ್ ಉಪಾಧ್ಯಾಯ, ಅಂಬಲಪಾಡಿ ಯುವಕ ಮಂಡಲದ ಅಧ್ಯಕ್ಷ ಹರೀಶ್ ಆಚಾರ್ಯ, ಮಾಜಿ ಅಧ್ಯಕ್ಷ ಪ್ರವೀಣ್ ಉಪಾಧ್ಯಾಯ, ಅಂಬಲಪಾಡಿ ಗ್ರಾಮ ಪಂಚಾಯತ್ ಸದಸ್ಯ ಹರೀಶ್ ಪಾಲನ್, ಎ.ಶಶಿಕಾಂತ ಶೆಣೈ, ಜಗದೀಶ್ ಕೆದ್ಲಾಯ ಅಂಬಲಪಾಡಿ, ಜೆಡಿಎಸ್ ಮುಖಂಡ ಬಾಲಕೃಷ್ಣ ಆಚಾರ್ಯ ಕಪ್ಪೆಟ್ಟು ಉಪಸ್ಥಿತರಿದ್ದರು.