ಮೀನುಗಾರಿಕಾ ಸಚಿವ ಮಾಂಕಾಳ ವೈದ್ಯ ದಿಢೀರ್ ಉಡುಪಿ ಜಿಲ್ಲಾ ಪ್ರವಾಸ
ಉಡುಪಿ,ಜೂ.19(ಉಡುಪಿ ಟೈಮ್ಸ್ ವರದಿ) ಮಾಜಿ ಸಚಿವ, ಬಿಜೆಪಿ ಮುಖಂಡನ ಮನೆಗೆ ಗುಪ್ತವಾಗಿ ಭೇಟಿ ನೀಡಿ ಕಾಂಗ್ರೆಸ್ ಕಾರ್ಯಕರ್ತರ ಕೆಂಗಣ್ಣಿಗೆ ಗುರಿಯಾಗಿದ್ದ ಮೀನುಗಾರಿಕಾ ಸಚಿವ ಮಾಂಕಾಳ ಎಸ್. ವೈದ್ಯ ಇಂದು ಮತ್ತೆ ಉಡುಪಿ ಜಿಲ್ಲೆಯಲ್ಲಿ ಪ್ರವಾಸ ಕೈಗೊಂಡಿದ್ದಾರೆ.
ಶುಕ್ರವಾರ ಅಧಿಕೃತವಾಗಿ ಉಡುಪಿ ಜಿಲ್ಲೆಯ ಪ್ರವಾಸದಲ್ಲಿದ್ದ ಉತ್ತರ ಕನ್ನಡದ ಜಿಲ್ಲಾ ಉಸ್ತುವಾರಿ ಮಾಂಕಾಳ್ ವೈದ್ಯ ಇವರು ಇಂದು ಕುಟುಂಬ ಸಮೇತ ಉಡುಪಿ ಜಿಲ್ಲೆಯಲ್ಲಿ ಪ್ರವಾಸ ಕೈಗೊಂಡಿದ್ದಾರೆ.
ಆದರೇ ಈ ಪ್ರವಾಸದ ಬಗ್ಗೆ ಜಿಲ್ಲಾ ಕಾಂಗ್ರೆಸ್ ಪದಾಧಿಕಾರಿಗಳಿಗೂ, ಅವರಿಗೆ ಬೆಂಗಾವಲು ನೀಡಬೇಕಾದ ಪೊಲೀಸರಿಗೂ ಯಾವುದೇ ಮಾಹಿತಿ ಇಲ್ಲವೆಂದು ತಿಳಿದುಬಂದಿದೆ.
ಅವರ ಶುಕ್ರವಾರ ಜಿಲ್ಲಾ ಪ್ರವಾಸದ ಸಂದರ್ಭದಲ್ಲಿ ಮೀನುಗಾರರ ಹಲವಾರು ಸಮಸ್ಯೆಗಳನ್ನು ಹೇಳಬೇಕಾದ ಜಿಲ್ಲೆಯ ಐದೂ ಶಾಸಕರು ಗೈರಾಗಿದ್ದರು. ಈಗಾಗಲೇ ಕಡಲು ಕೊರೆತ, ಮೀನುಗಾರರ ಡಿಸೇಲ್ ವಿತರಣೆ, ಬಡ ಮೀನುಗಾರರಿಗೆ ವಿತರಿಸಬೇಕಾಗಿದ್ದ ಮನೆ ಹಂಚಿಕೆ ಸಹಿತ ಹಲವಾರು ಗಂಭೀರ ಚರ್ಚೆಯಲ್ಲಿ ಭಾಗವಹಿಸಬೇಕಾಗಿದ್ದ ನೂತನ ಸಚಿವರು ಭಾಗವಹಿಸದಿರುವುದು ಕೂಡ ಅಚ್ಚರಿ ಎನಿಸಿದೆ.
