ಸಂತೆಕಟ್ಟೆ ಅಂಡರ್ ಪಾಸ್: ಸಚಿವೆ ಶೋಭಾ ಅವರ ಹೇಳಿಕೆ ಜನರ ಕಣ್ಣು ಒರೆಸುವ ನಾಟಕ: ಸುನೀಲ್ ಸಾಲ್ಯಾನ್
ಉಡುಪಿ ಜಿಲ್ಲಾ ಪಂಚಾಯತ್ ಸಭಾಂಗಣದಲ್ಲಿ ನಡೆದ ಜಿಲ್ಲಾ ಅಭಿವೃದ್ದಿ ಮತ್ತು ಉಸ್ತುವಾರಿ ಸಮಿತಿ ಸಭೆಯಲ್ಲಿ ಸಚಿವೆ ಶೋಭಾ ಕರಂದ್ಲಾಜೆಯವರು ಸಂತೆಕಟ್ಟೆ ಅಂಡರ್ ಪಾಸ್ ಹೊಂಡಗಳನ್ನು ಮುಚ್ಚಿ ಎಂದು ಸೂಚನೆ ನೀಡಿರುವುದು ಹಾಸ್ಯಾಸ್ಪದ ಹಾಗೂ ಜನರ ಕಣ್ಣು ಒರೆಸುವ ನಾಟಕದಂತೆ ಕಾಣುತ್ತಿದೆ ಎಂದು ಸಾಮಾಜಿಕ ಕಾರ್ಯಕರ್ತ ಸುನೀಲ್ ಸಾಲ್ಯಾನ್ ಕಡೆಕಾರ್ ಹೇಳಿದ್ದಾರೆ.
ಗುತ್ತಿಗೆದಾರರು ಮೇ 30ರ ಒಳಗೆ ತಡೆಗೋಡೆ ನಿರ್ಮಿಸಿ ಕೊಡುತ್ತೇವೆ ಎಂದು ಹೇಳಿದ್ದರೆ, ಈ ಬಗ್ಗೆ ಮೇ ಮೊದಲ ವಾರದಿಂದಲೇ ಗುತ್ತಿಗೆದಾರರ ಮೇಲೆ ಒತ್ತಡ ತರಬೇಕಿತ್ತು. ಅಧಿಕಾರಿಗಳಿಗೆ,ಗುತ್ತಿಗೆದಾರರಿಗೆ ಇಲ್ಲಿಯ ಮಳೆಯ ಬಗ್ಗೆ ಮಾಹಿತಿ ಇಲ್ಲದೇ ಇರಬಹುದು. ಆದರೆ, ನಿಮಗೆ ಮತ್ತು ಶಾಸಕರಿಗೆ ಅದರ ಬಗ್ಗೆ ಮಾಹಿತಿ ಇದೆ ತಾನೇ? ಈ ಬಗ್ಗೆ ಅಧಿಕಾರಿಗಳಿಗೆ ಮಾಹಿತಿ ಕೊಡಬಹುದಿತ್ತು ಅಲ್ಲವೇ ?.
ನೀವು ಹೊಂಡಗಳನ್ನು ಮುಚ್ಚಿ ಎಂದು ಸುಲಭವಾಗಿ ಸೂಚನೆ ನೀಡಿರುವುದು ನೋಡುವಾಗ ನೀವು ಸ್ಥಳಕ್ಕೆ ಭೇಟಿ ನೀಡಿರುವುದರ ಬಗ್ಗೆ ಕೂಡಾ ಸಂಶಯ ಬರುತ್ತಿದೆ. ಎಷ್ಟು ಉದ್ದಕ್ಕೆ ರಸ್ತೆ ಅಗೆಯಲಾಗಿದೆ ಎಂಬ ಬಗ್ಗೆ ನಿಮಗೆ ಮಾಹಿತಿ ಇದೆಯಾ ? ಹೊಂಡ ಮುಚ್ಚಲು ಇರುವ ತಾಂತ್ರಿಕ ಸಮಸ್ಯೆಗಳ ಬಗ್ಗೆ ನೀವು ಮಾಹಿತಿ ಪಡೆದುಕೊಂಡಿದ್ದೀರಾ ?
ಜೂನ್‌ನಲ್ಲಿ ಮಳೆಗಾಲ ಪ್ರಾರಂಭವಾಗುತ್ತದೆ ಎಂಬ ಅರಿವು ಇದ್ದು ಕೂಡಾ ನೀವು ನಿರ್ಲಕ್ಷ ತೋರಿ ಈಗ ಈ ರೀತಿ ಹೇಳಿಕೆ ನೀಡುತ್ತಿರುವುದು ಜನರ ಕಣ್ಣೊರೆಸುವ ನಾಟಕದಂತೆ ಕಾಣುತ್ತಿದೆ. ಹಾಗೂ ಸಮಸ್ಯೆಯನ್ನು ಪರಿಹರಿಸುವಲ್ಲಿ ನಿಮ್ಮ ಇಚ್ಚಾ ಶಕ್ತಿಯ ಕೊರತೆಯನ್ನು ತೋರಿಸುತ್ತಿದೆ ಎಂದು ಹೇಳಿದ್ದಾರೆ.
