ಕಾಂಗ್ರೆಸ್‌-ಬಿಜೆಪಿಯವರ ಅಹಂಕಾರದ ವಿರೋಧಿ ನಾನು- ಉಮಾನಾಥ್ ಕೋಟ್ಯಾನ್
ಮಂಗಳೂರು ಮಾ.14: ಕಾಂಗ್ರೆಸ್‌-ಬಿಜೆಪಿಯವರ ಅಹಂಕಾರದ ವಿರೋಧಿ ನಾನು. ಇದರ ವಿರುದ್ಧವಾಗಿ ನಾನು ಕೆಲಸ ಮಾಡುತ್ತೇನೆ ಎಂದು ಅಲ್ಪಸಂಖ್ಯಾಕರ ಸಭೆಯೊಂದರಲ್ಲಿ ಹೇಳಿರುವ ಮೂಡುಬಿದಿರೆ ಶಾಸಕರ ಉಮಾನಾಥ ಕೋಟ್ಯಾನ್ ಅವರ ವಿಡಿಯೋವೊಂದು ವೈರಲ್ ಆಗಿದೆ.
ಚುನಾವಣೆಯ ಹೊಸ್ತಿಲಿನಲ್ಲಿ ಶಾಸಕ ಉಮಾನಾಥ ಕೋಟ್ಯಾನ್ ಅವರ ಈ ಹೇಳಿಕೆ ಬಿಜೆಪಿಯಲ್ಲಿ ಹಲವು ಬಗೆಯ ಸಂಚಲನವನ್ನು ಸೃಷ್ಟಿ ಮಾಡಿದ್ದು, ಇರಿಸುಮುರಿಸಿಗೂ ಕಾರಣವಾಗಿದೆ ಎನ್ನಲಾಗುತ್ತಿದೆ.
ಕೆಲ ದಿನಗಳ ಹಿಂದೆ ಮೂಡುಬಿದಿರೆಯಲ್ಲಿ ನಡೆದ ಸಭೆಯಲ್ಲಿ ಮಾತನಾಡಿದ ಅವರ ಮಾತಿನ ತುಣುಕೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಈ ವೈರಲ್ ವಿಡಿಯೋದಲ್ಲಿ “ಮುಸಲ್ಮಾನರು, ಕ್ರೈಸ್ತರು ನಮಗೆ ಮತ ಹಾಕುವುದಿಲ್ಲ, ಅವರಿಗೆ ಯಾಕೆ ಕೆಲಸ ಮಾಡಿಕೊಡಬೇಕು ಎಂದು ಬಿಜೆಪಿಯವರು ಅಹಂಕಾರದ ಮಾತಾಡುತ್ತಾರೆ. ಕಾಂಗ್ರೆಸ್‌ನವರೂ ಮುಸ್ಲಿಮರು, ಕ್ರೈಸ್ತರೂ ನಮಗೇ ಮತ ಹಾಕಬೇಕು ವಿನಾ ಬೇರೆಯವರಿಗಲ್ಲ ಎನ್ನುತ್ತಾರೆ. ಈ ಧರ್ಮದವರನ್ನು ಅವರ ಕೂಲಿಯಾಳುಗಳಂತೆ ನೋಡುತ್ತಾರೆ, ಅಂಥ ಅಹಂಕಾರ ಕಾಂಗ್ರೆಸಿ ನವರಿಗೆ ಇದೆ. ನಮ್ಮ ಪಾರ್ಟಿ ಯವರಿಗೂ ಅಹಂಕಾರ ಇದೆ. ಇದನ್ನು ಬೇರೆಯವರು ಹೇಳುವುದಿಲ್ಲ, ನಾನು ನೇರ ನಡೆಯವನು ಆದ್ದರಿಂದ ಹೇಳುತ್ತೇನೆ’ ಆದರೆ ಇವೆರಡಕ್ಕೂ ವಿರುದ್ಧವಾಗಿ ನಾನು ಕೆಲಸ ಮಾಡುತ್ತೇನೆ ಎಂದಿದ್ದಾರೆ.
ಹಾಗೂ ನನ್ನ ಇಡೀ ಕ್ಷೇತ್ರ ನೋಡಿ, ಮಸೀದಿ ಚರ್ಚ್‌, ಬಸದಿಗೆ ತಾರತಮ್ಯ ಇಲ್ಲದೆ ಮಸೀದಿ, ಮದ್ರಸಾ, ರಸ್ತೆಗೆ ಅನುದಾನ ಕೊಟ್ಟಿದ್ದೇನೆ, ಇಂಟರ್‌ಲಾಕ್‌ ಹಾಕಿಸಿಕೊಟ್ಟಿದ್ದೇನೆ’ ಎಂದು ಶಾಸಕರು ಹೇಳಿಕೊಂಡಿರುವುದು ವೀಡಿಯೋದಲ್ಲಿ ಕಾಣಬಹುದಾಗಿದೆ.
