ಚುನಾವಣೆಯಲ್ಲಿ ಸೋಲಿಸಿದ ಕಾರ್ಯಕರ್ತರಿಗೆ ಧನ್ಯವಾದ ಹೇಳಿದ ಪ್ರಮೋದ್- ಸದಾಶಿವ ಅಮೀನ್
ಉಡುಪಿ: ಬಿಜೆಪಿ ಪಕ್ಷದ ವರಿಷ್ಟರು ತನ್ನನ್ನು ಗುರುತಿಸಿ ಮುಂಬರುವ ವಿಧಾನಸಭಾ ಚುನಾವಣೆಯಲ್ಲಿ ಟಿಕೆಟ್ ದಕ್ಕಿಸಿಕೊಳ್ಳಬೇಕೆಂಬ ಹಪಾಹಪಿಯಲ್ಲಿ ಕಾಂಗ್ರೆಸ್ ಪಕ್ಷದ ವಿರುದ್ಧ ದಿನಕ್ಕೊಂದು ಹೇಳಿಕೆ ನೀಡುವ ನಿಮ್ಮ ನಡವಳಿಕೆಯಿಂದ ನಿಮ್ಮನ್ನು ದೂರದಿಂದ ನೋಡುವ ಜನರು ಕೂಡ ನಿಮ್ಮ ಬಗ್ಗೆ ತಾತ್ಸಾರ ಪಡುವಂತೆ ಮಾಡುತ್ತದೆ.
ಮನುಷ್ಯ ತನ್ನ ಜೀವಿತಾವಧಿಯಲ್ಲಿ ತನಗೆ ಉಪಕಾರ ಮಾಡಿದ, ತನಗೆ ಅವಕಾಶ ನೀಡಿದ ವ್ಯಕ್ತಿಗೆ ಅಥವಾ ಪಕ್ಷಕ್ಕೆ ನಿಷ್ಠೆ ವ್ಯಕ್ತಪಡಿಸದೆ ಇದ್ದರೂ, ನಿಮ್ಮಂತೆ ಬಾಯಿಗೆ ಬಂದಂತೆ ಹೇಳಿಕೆಯನ್ನು ಪಕ್ಷದಿಂದ ಹೊರ ಹೋದ ಯಾವ ನಾಯಕನೂ ಕೂಡ ಕೊಡಲಿಲ್ಲ ಎಂಬ ಕನಿಷ್ಠ ಆಲೋಚನೆ ಕೂಡ ನಿಮಗೆ ಇಲ್ಲದೆ ಹೋದದ್ದು ವಿಪರ್ಯಾಸ .
ಹತ್ತಾರು ವರ್ಷಗಳ ಕಾಲ ಬಿಜೆಪಿ ಪಕ್ಷದ ಕಾರ್ಯಕರ್ತರು ಮತ್ತು ನಾಯಕರು ತಮ್ಮ ಹೋರಾಟದ ಮೂಲಕ ಕಟ್ಟಿ ಬೆಳೆಸಿದ ಪಕ್ಷದಲ್ಲಿ ಈಗ ತಾನು ಹೋಗಿ ಅಧಿಕಾರ ಪಡೆಯಬೇಕೆಂಬ ನಿಮ್ಮ ದುರಾಲೋಚನೆ ಮತ್ತು ದೂರಾಲೋಚನೆ ಎಲ್ಲರಿಗೂ ತಿಳಿದದ್ದೇ ….
ಗೆದ್ದಲು ಕಟ್ಟಿದ ಹುತ್ತದಲ್ಲಿ ಹಾವು ವಾಸ ಮಾಡುವುದು ಸಾದ್ಯವಿದೆ ಎಂದು ತಿಳಿದು ನೀವು ಕೂಡ ಬಿಜೆಪಿ ಕಾರ್ಯಕರ್ತರು ಕಟ್ಟಿದ ಪಕ್ಷದಲ್ಲಿ ಈಗ ವಾಸ ಮಾಡಲು ಬಯಸಿದ್ದೀರಿ…
ನಿಮ್ಮ ಈ ಎಲ್ಲ ತಂತ್ರಗಾರಿಕೆ ವಿಫಲ ಆಗುವುದು ನಿಶ್ಚಿತ ಆದರೂ ಒಂದೊಮ್ಮೆ ನೀವು ಇನ್ನೊಂದು ಪಕ್ಷದಿಂದ ಸ್ಪರ್ಧಿಸಿ ತಾನು ಸುಲಭವಾಗಿ ಗೆಲ್ಲುತ್ತೇನೆ ಎಂಬ ನಿಮ್ಮ ಭ್ರಮೆಯಲ್ಲಿ ಇದ್ದರೆ ಅದನ್ನು ಬಿಡುವುದು ಉತ್ತಮ..
ಸದಾಶಿವ ಅಮೀನ್ , ಕಟ್ಟೆಗುಡ್ಡೆ,ಉಪಾಧ್ಯಕ್ಷರು , ಉಡುಪಿ ಬ್ಲಾಕ್ ಕಾಂಗ್ರೆಸ್.
