ಪಡುಬಿದ್ರೆ: ಮನೆಗೆ ನುಗ್ಗಿ ಕಳ್ಳತನ

ಪಡುಬಿದ್ರಿ ಅ.16(ಉಡುಪಿ ಟೈಮ್ಸ್ ವರದಿ): ತೆಂಕ ಎರ್ಮಾಳಿನಲ್ಲಿ ಮನೆಯೊಂದಕ್ಕೆ ನುಗ್ಗಿದ ಕಳ್ಳನೋರ್ವ ನಗ-ನಗದು ದೋಚಿ ಪರಾರಿಯಾಗಿರುವ ಘಟನೆ ನಿನ್ನೆ ನಡೆದಿದೆ.

ಬಾಗಲಕೋಟೆ ಮೂಲದ ಪ್ರಸ್ತುತ ತೆಂಕ ಎರ್ಮಾಳಿನ ಮಾಸಪ್ಪ ಮಾದರ ಎಂಬವರ ಮನೆಯಲ್ಲಿ ಕಳ್ಳತನ ನಡೆದಿದೆ. ಮಾಸಪ್ಪ ಮಾದರ ಎಂಬವರು ಅ.2 ರಂದು ಸಂಜೆ ವೇಳೆ ತಾವು ವಾಸಿಸುತ್ತಿದ್ದ ಬಾಡಿಗೆ ಮನೆಗೆ ಬೀಗ ಹಾಕಿ ತಮ್ಮ ಸ್ವಂತ ಊರಾದ ಬಾಗಲಕೋಟೆಗೆ ಹೋಗಿದ್ದರು. 

ಅ.16 ರಂದು ಬೆಳಿಗ್ಗಿನ 4:30 ರ ವೇಳೆಗೆ ವಾಪಾಸ್ಸು ಬಂದು ಮನೆಯ ಹತ್ತಿರ ತಲುಪುವಾಗ ಒಬ್ಬ ಅಪರಿಚಿತ ವ್ಯಕ್ತಿಯು  ಮನೆಯ ಎದುರು ನಿಂತುಕೊಂಡಿದ್ದ. ಅಲ್ಲದೆ ಮಾಸಪ್ಪ ಮದರ ಅವರನ್ನು  ನೋಡಿದ ಕೂಡಲೇ ವ್ಯಕ್ತಿ ಸ್ಕೂಟರನ್ನು ಬಿಟ್ಟು ಮನೆಯ ಹಿಂಬದಿಯಿಂದ ಓಡಿ ಹೋಗಿರುತ್ತಾನೆ.

ಈ ವೇಳೆ ಮನೆಯ ಬೀಗ ತೆಗೆಯಲು ಹೋದಾಗ ಬಾಗಿಲಿನ ಬೀಗ ಒಡೆದಿರುವುದು ಕಂಡುಬಂದಿದೆ. ಮನೆಯ ಒಳಗೆ ಹೋಗಿ ನೋಡಿದಾಗ ನೋಡಿದಾಗ ಬಟ್ಟೆಬರೆಗಳು ಎಲ್ಲಾ ಚೆಲ್ಲಾ ಪಿಲ್ಲಿಯಾಗಿ ಬಿದ್ದಿದ್ದು, ಮನೆಯೊಳಗಿದ್ದ ಕಬ್ಬಿಣದ ಪಟ್ಟಿಗೆಯ ಬೀಗವನ್ನು ತುಂಡರಿಸಿ ತೆರೆದು ಅದರಲ್ಲಿದ್ದ ನಗದು 20,000 ರೂ. ಹಾಗೂ 25,000 ರೂ. ಮೌಲ್ಯದ ಚಿನ್ನಾಭರಣ ಕಳವಾಗಿರುವುದು ಗಮನಕ್ಕೆ ಬಂದಿದೆ.

ಈ ಬಗ್ಗೆ ಮಾಸಪ್ಪ ಮಾದರ ಅವರು ನೀಡಿದ ದೂರಿನಂತೆ ಪಡುಬಿದ್ರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.