ಕುಂದಾಪುರ: ತಂಡಗಳ ನಡುವೆ ಹೊಡೆದಾಟ- ದೂರು ಪ್ರತಿದೂರು ದಾಖಲು

ಕುಂದಾಪುರ ಅ.14 (ಉಡುಪಿ ಟೈಮ್ಸ್ ವರದಿ): ಕಸಬ ಗ್ರಾಮದ ಕೋಡಿ ಸೀವಾಕ್ ಸಮೀಪ ನಡೆದ ಗಲಾಟೆ ವಿಚಾರಕ್ಕೆ ಸಂಬಂಧಿಸಿ ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ಎರಡು ಪ್ರತ್ಯೇಕ ದೂರು ದಾಖಲಾಗಿದೆ.

ಈ ಗಲಾಟೆಗೆ ಸಂಬಂಧಿಸಿ ಕಸಬ ಗ್ರಾಮದ ಕೋಡಿಯ ಸುನೀಲ್ ಪೂಜಾರಿ ಎಂಬವರು ಪೊಲೀಸರಿಗೆ ನೀಡಿದ ದೂರಿನಲ್ಲಿ, ಅ.14 ರಂದು ಬೆಳಿಗ್ಗೆ ಸುನೀಲ್ ಪೂಜಾರಿ ಅವರು ಮನೆಯಿಂದ ತಮ್ಮ ದ್ವಿಚಕ್ರ ವಾಹನದಲ್ಲಿ ಕೋಡಿ ಸೀವಾಕ್ ಕಡೆಗೆ ಹೋಗುತ್ತಿರುವಾಗ ಕಸಬ ಗ್ರಾಮದ ಕೋಡಿ ವಾಟರ್ ಟ್ಯಾಂಕ್ ಬಳಿ ಶಿವ ಖಾರ್ವಿ ಎನ್ನುವವರ ದ್ವಿಚಕ್ರ ವಾಹನ ತಾಗಿ ಮಿರರ್ ಒಡೆದು ಹೋದ ವಿಚಾರದಲ್ಲಿ ಅವರಿಬ್ಬರ ನಡುವೆ ಗಲಾಟೆಯಾಗಿತ್ತು. ಈ ವೇಳೆ ಅಲ್ಲಿಗೆ ಬಂದ ಗುರುರಾಜ್ ಖಾರ್ವಿ ಎಂಬಾತ ಸುನೀಲ್ ಪೂಜಾರಿ ಅವರನ್ನು ತಡೆದು ನಿಲ್ಲಿಸಿ ಅವಾಚ್ಯ ಶಬ್ದದಿಂದ ಬೈಯ್ದು ಜೀವ ಬೇದರಿಕೆ ಒಡ್ಡಿರುವುದಾಗಿ ತಿಳಿಸಲಾಗಿದೆ.

ಇದೇ ಗಲಾಟೆಗೆ ಸಂಬಂಧಿಸಿ ಗುರುರಾಜ ಖಾರ್ವಿ ಎಂಬವರೂ ಪೊಲೀಸರಿಗೆ ದೂರು ನೀಡಿದ್ದು, ಕಸಬ ಗ್ರಾಮದ ಕೋಡಿ ಸೀವಾಕ್ ಹತ್ತಿರ ತನ್ನ ಮನೆಯ ಹಿಂಬದಿ ರಸ್ತೆಯಲ್ಲಿ ಗುರುರಾಜ ಖಾರ್ವಿ ಅವರು ನಡೆದುಕೊಂಡು ಹೋಗುತ್ತಿರುವಾಗ ಪ್ರಶಾಂತ, ಶಿವ ಯಾನೆ ಆಕಾಶ, ಕಾರ್ತಿಕ್ ಎನ್ನುವವರು ಗುರುರಾಜ ಅವರನ್ನು ತಡೆದು ಅವಾಚ್ಯ ಶಬ್ದದಿಂದ ಬೈಯ್ದಿದ್ದಾರೆ. ಹಾಗೂ ಪ್ರಶಾಂತ ಸೋಡಾ ಬಾಟಲಿಯಿಂದ ಕೈಗೆ ಹೊಡೆದು ಹಲ್ಲೆ ಮಾಡಿದ್ದು, ಪರಿಣಾಮ ಕೈಗೆ ಗಾಯವಾಗಿರುತ್ತದೆ. ಅಲ್ಲದೇ ಆರೋಪಿತರೆಲ್ಲರೂ ಸೇರಿಕೊಂಡು ಜೀವ ಬೆದರಿಕೆ ಒಡ್ಡಿ ಅಲ್ಲಿಂದ ತೆರಳಿದ್ದಾರೆ. ಅ.14 ರಂದು ಬೆಳಿಗ್ಗೆ ಕಸಬ ಗ್ರಾಮದ ಕೋಡಿ ಸೀ ವಾಕ್ ಬಳಿ ಗುರುರಾಜ ಅವರ ಚಿಕ್ಕಮ್ಮನ ಮಗ ಶಿವರಾಜ ಖಾರ್ವಿ ಯವರ ಬೈಕ್ ಗೆ ಕೋಡಿಯ ನಿವಾಸಿ ಸುನೀಲ್ ಎನ್ನುವವರ ಬೈಕ್ ತಾಗಿ ಮಿರರ್ ಒಡೆದ ವಿಚಾರದಲ್ಲಿ ರಾಜಿ ಮಾಡಿದ್ದೇ ಈ ಹಲ್ಲೆಗೆ ಕಾರಣವಾಗಿರುವುದಾಗಿ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಲಾಗಿದೆ.

ಈ ಎರಡೂ ಘಟನೆಗೆ ಸಂಬಂಧಿಸಿ ನೀಡಿದ ದೂರಿನಂತೆ ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ಎರಡು ಪ್ರತ್ಯೇಕ ಪ್ರಕರಣ ದಾಖಲಾಗಿದೆ.