ಹೆಜಮಾಡಿ: ಹಿರಿಯ ಕಾಂಗ್ರೆಸ್ ನಾಯಕ ಪೀಟರ್ ಅಲ್ಫ್ರೆಡ್ ಫುಟಾರ್ಡೋ ನಿಧನ

ಉಡುಪಿ ಆ.23(ಉಡುಪಿ ಟೈಮ್ಸ್ ವರದಿ): ಹೆಜಮಾಡಿ ಮತ್ತು ಪಲಿಮಾರು ಸಂಯುಕ್ತ ಮಂಡಲ ಪಂಚಾಯತಿಯ ಪ್ರಥಮ ಮಂಡಲ ಪ್ರಧಾನರಾಗಿ ಸೇವೆ ಸಲ್ಲಿಸಿದ್ದ, ಹಿರಿಯ ಕಾಂಗ್ರೆಸ್ ನಾಯಕ ಪೀಟರ್ ಅಲ್ಫ್ರೆಡ್ ಫುಟಾರ್ಡೋ ಅವರು ನಿನ್ನೆ ಮಂಗಳೂರಿನ ಖಾಸಗಿ ಅಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ.

88 ವರ್ಷದ ಪೀಟರ್ ಫುಟಾರ್ಡೋ ಅವರು ಅಲ್ಪ ಕಾಲದ ಅನಾರೋಗ್ಯದಿಂದ ಕೊನೆಯುಸಿರೆಳೆದಿದ್ದಾರೆ.

1935 ರ ಮಾ.20 ರಂದು ಜನಿಸಿದ ಅವರು ಸಮಾಜದಲ್ಲಿ ಕೊಡುಗೈ ದಾನಿಯಾಗಿ ಗುರುತಿಸಿಕೊಂಡಿದ್ದರು. ಅವರು ಮಾಜಿ ಮಂಡಲ ಪಂಚಾಯತ್ ಅಧ್ಯಕ್ಷರಾಗಿದ್ದ ಅವರು, ಅವರಾಲುಮಟ್ಟು ಶ್ರೀವೆಂಕಟರಮಣ ಹಿರಿಯ ಪ್ರಾಥಮಿಕ ಶಾಲಾ ಸಂಚಾಲಕರಾಗಿ, ಪಡುಬಿದ್ರೆ ವವ್ಯಸಾಯ ಸೇವಾ ಸಹಕಾರಿ ಸಂಘದ ಮಾಜಿ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ್ದರು.15 ವರ್ಷಗಳ ಕಾಲ ಸಂತ ಪಿಯುಸ್ ಚರ್ಚ್ ಉಪಾಧ್ಯಕ್ಷರಾಗಿ ಹಾಗೂ ಪಿಡ್ಲ್ಯುಡಿ ಗುತ್ತಿಗೆದಾರರಾಗಿ ಸೇವೆ ಸಲ್ಲಿಸಿದ್ದ ಇವರು, ಮುಲ್ಕಿ ಲಯನ್ಸ್ ಕ್ಲಬ್ ಸದಸ್ಯರಾಗಿಯೂ ಸೇವೆ ಸಲ್ಲಿಸಿದ್ದಾರೆ.

ಪತ್ನಿ ಎಲ್ಸಿ ಫುಟಾರ್ಡೊ, ಉದ್ಯಮಿ, ಪಲಿಮಾರು ಗ್ರಾಮ ಪಂಚಾಯತ್ ಮಾಜಿ ಅಧ್ಯಕ್ಷ ಜಿತೇಂದ್ರ ಫುಟಾರ್ಡೊ ಸಹಿತ ಮೂವರು ಪುತ್ರರು, ಹಿರಿಯ ನ್ಯಾಯವಾದಿ ಶಾಲೆಟ್ ಫುಟಾರ್ಡೊ ಸಹಿತ ಇಬ್ಬರು ಪುತ್ರಿಯರು ಹಾಗೂ ಅಪಾರ ಅಭಿಮಾನಿಗಳನ್ನು ಅಗಲಿದ್ದಾರೆ.

ಇವರ ನಿಧನಕ್ಕೆ ಮಾಜಿ ಸಚಿವ ವಿನಯ್ ಕುಮಾರ್ ಸೊರಕೆ, ಶಾಸಕ ಲಾಲಾಜಿ ಅರ್ ಮೆಂಡನ್, ಮಾಜಿ ಶಾಸಕ ಐವನ್ ಡಿಸೋಜ ಮತ್ತಿತರರು ಸಂತಾಪ ಸೂಚಿಸಿದ್ದಾರೆ.