ಬ್ರಹ್ಮಾವರ: ಪಡಿತರ ಅಕ್ಕಿ ಅಕ್ರಮ ಸಾಗಾಟ- ಓರ್ವನ ಬಂಧನ

ಬ್ರಹ್ಮಾವರ ಜು.31(ಉಡುಪಿ ಟೈಮ್ಸ್ ವರದಿ): ಪಡಿತರ ಅಕ್ಕಿಯನ್ನು ಅಕ್ರಮವಾಗಿ ಸಾಗಾಟ ಮಾಡುತ್ತಿದ್ದ ವಾಹನವನ್ನು ತಡೆದ ಪೊಲೀಸರು ಓರ್ವನನ್ನು ಬಂಧಿಸಿ, 77 ಸಾವಿರ ರೂ. ಮೌಲ್ಯದ ಅಕ್ಕಿಯನ್ನು ವಶಪಡಿಸಿಕೊಂಡಿದ್ದಾರೆ.

ಅಕ್ಕಿ ಸಾಗಾಟ ಮಾಡುತ್ತಿದ್ದ ಉಸ್ಮಾನ್ ಬಂಧಿತ ಆರೋಪಿ.ಅಕ್ರಮವಾಗಿ ಪಡಿತರ ಅಕ್ಕಿಯನ್ನು ಸಾಗಾಟ ಮಾಡುತ್ತಿದ್ದ ವಾಹನವನ್ನು ತಡೆದಿರುವುದಾಗಿ ಬ್ರಹ್ಮಾವರ ಪೊಲೀಸರು ನೀಡಿದ ಮಾಹಿತಿ ಮೇರೆ ಬ್ರಹ್ಮಾವರ ತಾಲೂಕು ಆಹಾರ ನಿರೀಕ್ಷಕರಾದ ಎಂ.ಟಿ.ಲೀಲಾನಂದ ಅವರು ಬ್ರಹ್ಮಾವರ ಉಪ್ಪಿನಕೋಟೆ ರಾಷ್ಟ್ರೀಯ ಹೆದ್ದಾರಿ ಸಮೀಪ ತೆರಳಿ ಪರಿಶೀಸಿದಾಗ ವಾಹನದ ಚಾಲಕ ಉಸ್ಮಾನ್ ಎಂಬಾತ ಯಾವುದೇ ದಾಖಲೆ ಇಲ್ಲದೆ ಅಕ್ಕಿಯನ್ನು ಸಾಗಿಸುತ್ತಿದ್ದೂದು ತಿಳಿದು ಬಂದಿದೆ.

ಈ ಬಗ್ಗೆ ಆತನ ಬಳಿ ವಿಚಾರಿಸಿದಾಗ ಆತನು ವಾಹನದ ಮಾಲಕರಾದ ಬಾಬು ಎಂಬವರು ತಿಳಿಸಿದಂತೆ ತಾನು ಬೈಂದೂರಿನ ಶಿರೂರಿನಿಂದ ಶರೀಫ್ ಎಂಬವರು ವಾಹನಕ್ಕೆ ಅಕ್ಕಿಯನ್ನು ತುಂಬಿಸಿ ಕಳುಹಿಸಿದ್ದನ್ನು ಉಪ್ಪೂರಿನ ಅಜಿತ್ ಶೆಟ್ಟಿಯವರ ಅಕ್ಕಿ ಮಿಲ್ಲಿಗೆ ಸಾಗಾಟ ಮಾಡುತ್ತಿರುವುದಾಗಿ ತಿಳಿಸಿರುತ್ತಾನೆ.

ವಾಹನ ಚಾಲಕನನ್ನು ಬಂಧಿಸಿದ ಪೊಲೀಸರು ವಾಹನದಲ್ಲಿ ಇದ್ದ 77,000 ರೂ.ಮೌಲ್ಯದ ಅಕ್ಕಿಯನ್ನು ಹಾಗೂ ವಾಹನವನ್ನು ವಶಪಡಿಸಿಕೊಂಡಿದ್ದಾರೆ. ಈ ಬಗ್ಗೆ ಬ್ರಹ್ಮಾವರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.