ಉಡುಪಿ: ಸಂಗೀತ ವಿದುಷಿ ಚೇತನಾ ಆಚಾರ್ಯರಿಗೆ ಡಾಕ್ಟರೇಟ್
ಉಡುಪಿ: ಪ್ರಸಿದ್ಧ ಸಂಗೀತ ವಿದುಷಿ ಚೇತಾನಾ ಆಚಾರ್ಯ ಉಡುಪಿ ಇವರಿಗೆ ಬೆಂಗಳೂರಿನ ಜೈನ್ ವಿಶ್ವವಿದ್ಯಾಲಯವು ‘ಡಾಕ್ಟರೇಟ್’ ಪದವಿಯನ್ನು ನೀಡಿ ಗೌರವಿಸಿತು.
ಚೇತನಾ ಆಚಾರ್ಯ ಇವರು ಜೈನ್ ವಿಶ್ವವಿದ್ಯಾಲಯದ ಡಾ. ಮೀರಾ ರಾಜಾರಾಮ್ ಪ್ರಾಣೇಶ್, ಇವರ ಫ್ರೌಢ ಮಾರ್ಗದರ್ಶನದಲ್ಲಿ ಮಂಡಿಸಿದ ಭಕ್ತಿ ಸಂಗೀತದ “ಅಗ್ರಪೀಠ-ಉಡುಪಿ ಕ್ಷೇತ್ರ” (14ರಿಂದ19ನೇ ಶತಮಾನ) ಎನ್ನುವ ಮಹಾಪ್ರಬಂಧಕ್ಕೆ ಜೈನ್ ವಿಶ್ವವಿದ್ಯಾಲಯವು ಪಿಹೆಚ್‌ಡಿ ಪದವಿಯನ್ನಿತ್ತು ಗೌರವಿಸಿತು.
ನಾವೂರು ಸುಬ್ರಹ್ಮಣ್ಯ ಆಚಾರ್ಯ, ಲಕ್ಷೀ ಆಚಾರ್ಯ ದಂಪತಿಯ ಸುಪುತ್ರಿಯಾದ ಚೇತನಾ ಆಚಾರ್ಯ ಇವರು, ಸಂಗೀತದಲ್ಲಿ ಸ್ನಾತಕೋತ್ತರ ಶಿಕ್ಷಣವನ್ನು ಮದ್ರಾಸ್ ವಿಶ್ವವಿದ್ಯಾಲಯದಲ್ಲಿ ಪೂರೈಸಿ ನಂತರ ಪಿಹೆಚ್‌ಡಿ ಪದವಿಗಾಗಿ ಜೈನ್ ವಿಶ್ವವಿದ್ಯಾಲಯದಲ್ಲಿ ಪ್ರವೇಶಾತಿಯನ್ನು ಪಡೆದಿದ್ದರು. ಸಂಗೀತದ ಕ್ಷೇತ್ರದಲ್ಲಿ ಆಕಾಶವಾಣಿಯ ‘ಎ’ ಗ್ರೇಡ್ ಕಲಾವಿದೆ ಹಾಗೂ ಚಿತ್ರರಂಗದ ಹಿನ್ನಲೆ ಗಾಯಕಿಯಾಗಿ ಪ್ರಸಿದ್ಧರಾಗಿರುವ ಚೇತನಾ ಆಚಾರ್ಯ ಇವರು ಪ್ರಸ್ತುತ ನೂರಾರು ವಿದ್ಯಾರ್ಥಿಗಳಿಗೆ ಸಂಗೀತ ಶಿಕ್ಷಣವನ್ನು ತಮ್ಮ ಗಾಂಧರ್ವಮ್ ಸಂಗೀತ ವಿದ್ಯಾಲಯ, ಉಡುಪಿ ಮುಖಾಂತರ ನೀಡುತ್ತಿರುವರು.
