ಎಸ್ಸಿ/ ಎಸ್ಟಿ ಕಾಯಿದೆಯ ದುರ್ಬಳಕೆ ಆಗದಂತೆ ನೋಡಿಕೊಳ್ಳಬೇಕು: ಹೈ ಕೋರ್ಟ್
ಬೆಂಗಳೂರು ನ.3 : ದೌರ್ಜನ್ಯ ಮತ್ತು ತಾರತಮ್ಯದಿಂದ ಒಂದು ಸಮುದಾಯವನ್ನು ರಕ್ಷಿಸುವ ಸಲುವಾಗಿ ರೂಪಿಸಲಾಗಿರುವ ಎಸ್ಸಿ/ ಎಸ್ಟಿ ಕಾಯಿದೆಯ ದುರ್ಬಳಕೆ ಆಗದಂತೆ ನೋಡಿಕೊಳ್ಳಬೇಕು. ಈ ನಿಟ್ಟಿನಲ್ಲಿ ಜಾತಿ ನಿಂದನೆ ಆಗದಿದ್ದರೆ ಎಸ್ಸಿ/ಎಸ್ಟಿ ಕಾಯ್ದೆ ಅನ್ವಯವಾಗುವುದಿಲ್ಲ ಎಂದು ಹೈ ಕೋರ್ಟ್ ಹೇಳಿದೆ.
ಪ್ರಕರಣವೊಂದಕ್ಕೆ ಸಂಬಂಧಿಸಿ ಆದೇಶ ನೀಡಿರುವ ನ್ಯಾ. ಶ್ರೀನಿವಾಸ್ ಹರೀಶ್ ಕುಮಾರ್ ಅವರಿದ್ದ ಏಕಸದಸ್ಯ ಪೀಠ, ಯಾವುದೇ ಅಪರಾಧ ಪ್ರಕರಣದಲ್ಲಿ ಸಂತ್ರಸ್ತರು ಪರಿಶಿಷ್ಟ ಜಾತಿ/ ಜನಾಂಗಕ್ಕೆ ಸೇರಿದವರು ಎಂಬ ಮಾತ್ರಕ್ಕೆ ಎಸ್ಸಿ/ ಎಸ್ಟಿ ದೌರ್ಜನ್ಯ ತಡೆ ಕಾಯಿದೆಯ ನಿಬಂಧನೆಗಳನ್ನು ಅನ್ವಯಿಸಲಾಗದು. ಕಾಯ್ದೆಯ ನಿಜವಾದ ಆಶಯವನ್ನು ಕಾಯ್ದುಕೊಳ್ಳುವ ನಿಟ್ಟಿನಲ್ಲಿ ಕಾಯ್ದೆಯ ದುರ್ಬಳಕೆ ಮಾಡಿಕೊಳ್ಳಲು ಅವಕಾಶ ನೀಡಬಾರದು. ಇಂತಹ ಪ್ರಕರಣಗಳಲ್ಲಿ ಆರೋಪ ಪಟ್ಟಿ ಸಲ್ಲಿಸುವಾಗ ವಿವೇಕದ ನಿರ್ಧಾರ ಕೈಗೊಳ್ಳುವ ಹೊಣೆಗಾರಿಕೆ ತನಿಖಾಧಿಕಾರಿಗಳ ಮೇಲಿರುತ್ತದೆ ಎಂದು ನ್ಯಾಯಪೀಠ ಹೇಳಿದೆ.
ಶ್ರೀ ಸಂಗಮ್ ಪ್ರಿಯ ಅವರ ದೂರು ಆಧರಿಸಿ ಬೆಂಗಳೂರಿನ ಹಲಸೂರು ಪೊಲೀಸರು ಅರ್ಜಿದಾರರ ವಿರುದ್ಧ ಎಸ್ಸಿ /ಎಸ್ಟಿ ಕಾಯಿದೆ ಸೆಕ್ಷನ್ 3(1) (ಎಫ್), 3(1) (ಜಿ) ಮತ್ತು ಐಪಿಸಿ ಸೆಕ್ಷನ್ 172 ಮತ್ತು 173 ರಡಿ ಎಫ್‍ಐಆರ್ ದಾಖಲಿಸಿದ್ದರು. ಇಬ್ಬರ ನಡುವೆ ಆಸ್ತಿ ವಿವಾದ ಏರ್ಪಟ್ಟಿತ್ತು. ಆದೇ ಕಾರಣಕ್ಕಾಗಿ ಶ್ರೀ ಸಂಗಮ್ ಪ್ರಿಯ ತಮ್ಮ ವಿರುದ್ಧ ಎಸ್ಸಿ/ಎಸ್ಟಿ ಕಾಯಿದೆ ದುರ್ಬಳಕೆ ಮಾಡಿಕೊಂಡು ಸುಳ್ಳು ಕೇಸು ದಾಖಲಿಸಿದ್ದಾರೆ. ಹಾಗಾಗಿ ಅದನ್ನು ರದ್ದುಗೊಳಿಸಬೇಕು ಎಂದು ಹೈಕೋರ್ಟ್ ಮೊರೆ ಹೋಗಿದ್ದರು.
ಈ ಪ್ರಕರಣಕ್ಕೆ ಸಂಬಂಧಿಸಿ ಆದೇಶ ನೀಡಿರುವ ಹೈಕೋರ್ಟ್, ಕೃತ್ಯಗಳ ಸಂದರ್ಭದಲ್ಲಿ ತನಿಖೆಯಿಂದ ವ್ಯಕ್ತಿಗಳ ಉದ್ದೇಶ ನಿಜಕ್ಕೂ ಪರಿಶಿಷ್ಟರ ವಿರುದ್ಧ ದೌರ್ಜನ್ಯ ಎಸಗುವುದು, ನಿಂದಿಸುವುದು ಅಥವಾ ತಾರತಮ್ಯ ಮಾಡುವುದಾಗಿದ್ದರೆ ಅಂಥ ಸಂದರ್ಭದಲ್ಲಿ ಮಾತ್ರ ಸೆಕ್ಷನ್ 3 ವಿಧಿಸಿ, ಆರೋಪಿಗಳ ವಿರುದ್ಧ ಆರೋಪ ಪಟ್ಟಿ ಸಲ್ಲಿಸಬಹುದು ಎಂದು ಹೈಕೋರ್ಟ್ ಆದೇಶಿಸಿದೆ. ಹಾಗೂ ಇದರೊಂದಿಗೆ ಪ್ರತಿಯೊಂದು ಅಪರಾಧ ಘಟನೆಯಲ್ಲೂ ಸಂತ್ರಸ್ತರು ಪರಿಶಿಷ್ಟ ಜಾತಿ ಮತ್ತು ಪಂಗಡದ ಸಮಯುದಾಯಕ್ಕೆ ಸೇರಿದವರಾದರೆ, ಆಗ ಎಸ್ಸಿ/ ಎಸ್ಟಿ ದೌರ್ಜನ್ಯ ತಡೆ ಕಾಯಿದೆಯ ಸೆಕ್ಷನ್ 3 ವಿಧಿಸಲಾಗದು. ಅಪರಾಧದ ಹಿಂದಿನ ಉದ್ದೇಶ ಜಾತಿ ನಿಂದನೆಯಾಗಿರದಿದ್ದರೆ ಎಸ್ಸಿ/ ಎಸ್ಟಿ ಕಾಯಿದೆಯ ನಿಬಂಧನೆಗಳನ್ನು ಹೇರದೆ, ಭಾರತೀಯ ದಂಡ ಸಂಹಿತೆಯಡಿ ಲಭ್ಯವಿರುವ ಸೆಕ್ಷನ್‍ಗಳನ್ನು ಘಟನೆಯ ಹಿನ್ನೆಲೆ ಆಧರಿಸಿ ವಿಧಿಸುವುದು ಸೂಕ್ತ ಎಂದು ಹೇಳಿದೆ.
